جاپانيان له حامد کرزي د فساد ختمولو غوښتنه لري

جاپانيان وايي پر کرزي به ټينگار کوي چې حکومت والي ښه کړي

ولسمشر حامد کرزى جاپان ته په پنځه ورځني سفر خوځيدلى دى او ويل کيږي چې د توکيو چارواکي به د افغان حکومتدارۍ يا حکومت والۍ او اداري فساد په برخه کې معلومات غواړي .

په نړيوالو مرستندويانو کې جاپان د افغان حکومت يو مهم ملاتړى دى . تير کال توکيو د افغانستان د بيا رغاونې لپاره د پنځه ميليارده ډالرو ژمنه وکړه .

دا جاپان ته د ولسمشر کرزي څلورم او ښايي تر ټولو گران سفر دى .

په توکيو کې د بهرنيو چارو وزارت وايي جاپاني مشرتوب هوډ لري چې له ولسمشر کرزي سره د افغان حکومت پر ننگونو خبرې وکړي .

د دوى په گومان کابل بايد د حکومت والۍ ښه کولو ته کار وکړي .

جاپان مني چې دا کار اسانه نه دى خو پوهيږي چې جاپاني ولس د خپل هر لگول شوي ډالر حساب ترې غواړي .

د نړيوال رڼښت يا شفافيت د څار ټولنه وايي د فساد له پلوه په ټوله نړۍ کې يوازې سوماليا تر افغانستان وروسته ده .

طبعيي زيرمې

د افغانستان طبعيي زيرمې هم د جاپان د بهرنيو چارو د وزارت له خولې د خبرو يوه موضوع ده.

په روانه اوونۍ کې رپوټونه خپارۀ شول چې افغانستان د زرو ميليارده ډالرو په ارزښت طبعيي زيرمې لري .

جاپان به يو وار بيا ولسمشر کرزي ته دا په ډاگه کوي چې د دوى د پيسو د ښې لگونې ډاډ ورکړي .

ولسمشر کرزى به له وسله والو مخالفانو سره د خپلو تگلارو په اړه جاپاني مشرتابۀ ته معلومات ورکوي او د دغو پلانونو د عملي کولو لپاره به ترې د مالي مرستو غوښتنه لري .

ولسمشر کرزى پوهيږي چې جاپان ته د دۀ د پخوانيو سفرونو په پرتله اوس له دۀ غوښتنې او هيلې ډيرې دي ، که پکې پاتې شي نو د نړۍ په روان اقتصادي بحران کې د مرستو ترلاسه کول ورته اسانه نه دي .