د خوست ولايت د ډيري په نامۀ د کلي يوۀ اوسيدونکي تواب غورځنگ د خپلې سيمې عکسونه بي بي سي پښتو ويبپاڼې ته ليږلي چې دلته يې ليدلى شئ .
د خټينو کورونو ، جگو غرونو او شنو کروندو دا کلى ډيرى نوميږي چې د خوست ولايت په مرکز پورې تړاو لري او د ښار ختيځ لور ته پروت دى .
د کلي خټين کورونه چې يو نيم يې دوه پوړه لري په ژمي تاوده او په دوبي ساړه دي
د کلي هديره ورځ په ورځ پراخيږي ، دلته زيارتونه هم شته او پاخۀ قبرونه هم ليدل کيږي .
د ډيري کلي په سلو کې تر اتيا ډير وگړي په کر کيله بوخت دي او له همدې لارې ډوډۍ پيدا کوي .
چې لو زلمي ستړي کړي د شنو ونو ډډ ته تکيه وکړي او له کوره راوړې شړومبې يې تنده ماتوي
سپېده چاود مهال د ډيري کلي سکوت خپل خوند لري
د اوږدې ورځې له سړو تودو وروسته لمر په لوړو غرونو سر کښيږدي او د ډيرى کلي اوسيدونکي د ښه سهار په هيله خوب ته پناه يوسي .
