ورکه شوې برتانوي کورنۍ له "اسلامي دولت سره خوندي" ده

يوه ۱۲ کسيزه برتانوي کورنۍ چې وړاندې لا درکه شوې وه، له اسلامي دولت ډلې (داعش) سره يو ځای شوې ده. د دې کورنۍ په اړه يوه خپره شوې خبرپاڼه کې راغلي چې دوی تر پخوا خوندي دي.

دغه خبرپاڼه د داعش ډلې د يوه غړي له خوا خپره شوې، دوی وايي دغه کورنۍ د اسلامي دولت ډلې له خوا نه ده تښتول شوې، بلکې په خپله خوښه ورسره يو ځای شوې ده.

د دريو ماشومانو په ګډون دغه کورنۍ د بريتانيا، لوټن سيمه کې استوګن وه چې د مۍ له ۱۷ نېټې راپه دېخوا لادرکه شوې وه.

دغه کورنۍ لومړی بنګله دېش بيا ترکيې او له هغه ځايه سوريې ته تللې وه.

بي بي سي ته دا خبرپاڼه د اسلامي دولت ډلې لپاره يوه برتانوي جنګيالي استولې ده. په خبرپاڼه کې راغلي چې دا کورنۍ د "ظلم او درغلۍ څخه پاکې ځمکې ته راغلي ده".

په خبرپاڼه کې دغه کورنې وايي " له هغو کسانو چې زموږ په اړه اندېښمن دي غواړو چې زموږ په اړه فکر پرېږدي، موږ تر پخوا خوندي يوو"

اسلامي دولت ډلې د عراق او سوريې ډېرې برخې تر ولکې لاندې راوستې دي.

ويل کېږي دا ډله خپل مخالفان په ډېره بې رحمانه ډول وژني پر دوی د بشري حقونو د سرغړونو او په ډله ييز ډول د خلکو د وژل تور دي.

دغې ډلې د ۲۰۱۴ کال د جون مياشتې پر ۲۹ نېټه د خلافت اعلان وکړ.

تېره اوونۍ د بريتانيا د دفاع وزير د بريتانيا له پارلمان په سوريه کې د اسلامي دولت ډلې پر وړاندې د هوايي بمبارۍ د اجازې غوښتنه کړې وه.

بريتانيا له سپټمبر مياشتې په عراق کې د داعش پر هدفونو بمباري کوي.

ويل کېږي اسلامي دولت ډلې د تونس په شمال ختيځ سوسه ښار کې د جمعې پر ورځ (جون ۲۶) د يوه وسله وال کس له خوا بريد کې ۳۸ کسان وژل شوي وو، چې ډېری يې بريتانويانو وو.

تېره اوونۍ د بريتانيا لومړي وزير ډېويډ کامرون ويلي وو چې د اسلامي دولت نومې ډلې سره جګړه د نسل لوی سر خوږی دی.