Thèid RET a leudachadh gu mòr, ach tha ceist mu atharrachadh san sgeama son carbadan mòra coimearsalta.

Dhearbh Riaghaltas na h-Alba gun cum an sgeama a' dol anns na h-Eileanan Siar, Colla agus Tiriodh san ùine fhada, agus gun tèid a leudachadh gu grunn sgìrean eile.

Bidh aiseagan Cholbhasa, Ile agus Giogha fon sgeama bhon Damhair 2012.

Bho 2014 bidh RET air aiseag Arainn agus as dèidh sin thèid a leudachadh gu grunn slighean eile, nam measg aiseagean Ratharsair, Armadal, Caolas na Hearadh agus Caolas Bharraigh.

Thuirt an riaghaltas ge-ta gum bi atharrachadh air an sgeama son carbadan mòra coimearsalta.

Thèid an toirt a-mach a sgeama RET is bidh sgeama lughdachaidh eile ann dhaibh stèidhichte air an t-siostam a bh'ann mus robh RET ann.

Tha dragh ann gur dòcha gum fàg sin gun tèid na cosgaisean aig cuid de chompanaidhean bathair an àrd.

Thuirt ball nan Eilean Siar aig Holyrood, Alasdair Allan, a tha cuideachd sa chaibineat, gum bruidhinn e ri companaidhean a tha a' creidsinn gu bheil na h-atharrachaidhean a' dol a thoirt droch bhuaidh orra.

Thuirt e gun tog e draghan sam bith a th'orra leis an riaghaltas.