Spurs yatota 4-0, Inter waadhiriwa 5-2

Meneja wa Tottenham Harry Redknapp amesema timu yake iliachwa ikipigana "vita isiyoweza kushinda" baada ya kucheza wakiwa 10 na kusulubiwa kwa kipigo cha mabao 4-0 dhidi ya Real Madrid.

Mshambuliji wa Spurs Peter Crouch alitolewa nje baada ya dakika ya 14 za mchezo hatua ya robo fainali ya Ubingwa wa vilabu vya Ulaya, mkondo wa kwanza, kutokana na kuoneshwa kadi mbili za njano kwa rafu mbaya alizocheza.

"Ilikuwa kibarua kigumu tukicheza 10," alisema Redknapp. "Mnatakiwa kuwa 11 na pia uwe katika kiwango kizuri kuweza kupata matokeo hapa.

"Bado kazi haijamalizika hadi itakapomalizika, lakini tuna mlima mrefu kuukwea."

Spurs kwa muda wa dakika 75 walicheza wakiwa 10 na tayari walikuwa nyuma kwa bao moja baada ya Emmanuel Adebayor kupachika bao mapema kwa kichwa kabla ya Crouch kutolewa nje.

Adebayor mshambuliaji wa zamani wa Adebayor aliendelea kupachika mabao mara tu baada ya kuanza kipindi cha pili, kabla Angel di Maria na Cristiano Ronaldo kukamilisha kazi kwa kupata ushindi mnono. Real Madridi katika La Liga wanashikilia nafasi ya pili nyuma ya Barcelona.

Tottenham ilikumbwa na taharuki kabla ya mchezo kuanza, baada ya kulazimika kufanya mabadiliko ya kikosi chake cha kwanza baada ya Aaron Lennon kutojisikia vizuri na nafasi yake ikachukuliwa na Jermaine Jenas.

Redknapp ameongeza kusema: "Tulimpoteza Aaron Lennon dakika chache kabla ya mchezo kuanza, hakuwa anajisikia vizuri, alisema tu hana nguvu. Ilitulazimu kufanya mabadiliko wakati tukitoka katika chumba cha kubadilishia nguo.

"Baadae tukafungwa bao moja na isitoshe Crouchy akatolewa nje."

Crouch alioneshwa kadi ya kwanza ya njano katika dakika ya nane baada ya kumchezea rafu mbaya Sergio Ramos na baada ya dakika sita akaoneshwa kadi ya pili ya manjano iliyofuatiwa na nyekundu na akatolewa nje kwa kumchezea rafu Marcelo karibu na kisanduku cha lango la Madrid.

Crouch alikataa kuzungumza baada ya mchezo katika uwanja wa Bernabeu, lakini nahodha wa Tottenham Michael Dawson, amebainisha Crouch aliwaomba radhi wachezaji wenzake.

Kwa Spurs kupoteza mchezo huo ina maana, sasa itawabidi wafanye kazi ngumu kupita kiasi kuweza kusonga mbele watakapokumbana na Real Madrid wiki ijayo katika uwanja wao wa White Hart Lane, lakini Redknapp anafahamu fika kazi waliyonayo ni kubwa kupita kiasi na hawapewi nafasi ya kusonga mbele, na amekataa kukiri kwamba wametolewa.

Na katika mchezo mwengine Schalke ilifanikiwa kufunga mabao matatu katika kipindi cha pili na kuvuruga mipango ya Inter Milan ya kutetea ubingwa wao wa vilabu vya Ulaya na kuwalaza mabingwa hao watetezi mabao 5-2.

Inter Milan ndio walikuwa wa kwanza kupata bao dakika ya kwanza ya mchezo lililofungwa na Dejan Stankovic, kabla Joel Matip kusawazisha.

Diego Milito akaipatia Inter bao la pili kabla ya Goncalves Edu kujibu mapigo na kuisawazishia Schalke na matokeo yakawa 2-2.

Baada ya hapo katika kipindi cha pili Schalke walicharuka na alikuwa Raul Gonzalez aliyefunga bao la tatu na Andrea Ranocchia akajifunga mwenyewe na kuipatia Schalke bao la nne. Inter walipata pigo baada ya mlinzi wao wa kutegemewa Cristian Chivu kuoneshwa kadi nyekundu na kutolewa nje, kabla Edu kumalizia kazi kwa kufunga bao zuri la tano.

Kwa Schalke, iliyo katikati mwa msimamo wa ligi ya Ujerumani maarufu Bundesliga, kufika hatua ya nusu fainali ya Ubingwa wa Ulaya kwa mara ya kwanza, ambapo huenda wakakabiliana na ama Chelsea au Machester United, inaonekana ni jambo wanalotazamia sasa.