انگلینڈ پھر نہ جیت سکا

فٹبال ورلڈ کپ دو ہزار دس کے گروپ سی کا میچ انگلینڈ اور الجیریا کے درمیان برابر رہا اور دونوں ٹیمیں گول کرنے میں ناکام رہیں۔

کلِک فٹبال ورلڈ کپ پر بی بی سی اردو ڈاٹ کام کا خصوصی ضمیمہ

کلِک ورلڈ کپ کا آٹھواں دن: تصاویر

کیپ ٹاؤن میں ہونے والے اس میچ میں انگلینڈ کی ٹیم اپنی فارم میں نہ آ سکی اور اپنے پہلے کھیلے گئے میچ کی طرح چانس ضائع کرتی رہی۔

بگیرہ اور رونی

کھیل کے پہلے ہاف میں دونوں ٹیموں میں سے کوئی بھی ٹیم گول نہ کر سکی اگرچہ انگلینڈ نے الجیریا پر دباؤ ڈالنے کی کوشش کی۔

انگلینڈ کے وین رونی، سٹیفن جیرالڈ اور ہیسکی گیند کو گول میں پھینکنے کی کوششیں کرتے رہے لیکن ان کی کوئی بھی ہٹ ایسی نہیں تھی جو الجیریا کے گول کیپر کو پریشان کر سکتی۔

دوسرا ہاف بھی اسی طرح ہوا اور انگلینڈ کی ٹیم گول کرنے کے مواقع ضائع کرتی رہی۔

میچ کے بعد انگلینڈ ٹیم کے کپتان سٹیفن جیرالڈ نے کہا کہ جو چیز میچ میں ’مِسنگ‘ تھی وہ گول تھے۔

انہوں نے کہا کہ انہیں یہ نہیں پتہ کہ یہ کیوں ہوا لیکن وہ اب دیکھیں گے کہ مسئلہ کیا ہے۔

دونوں ٹیموں کے لیے یہ میچ جیتنا انتہائی ضروری تھا۔ اگر انگلینڈ یہ میچ ہار جاتا تو اسے ٹورنامنٹ میں رہنے کے لیے اپنا اگلا میچ سلوینیا کے ساتھ ہر حال میں جیتنا تھا۔لیکن اگر الجیریا یہ میچ ہارتا تو وہ اگلے راؤنڈ میں نہیں جا سکتا تھا۔

انگلینڈ اور الجیریا دونوں ٹیمیں اپنے پہلے میچوں میں ورلڈ کپ میں متعارف کیے گئے نئے گیند کا شکار ہوئی ہیں۔ امریکہ کے خلاف میچ میں انگلینڈ کے گول کیپر کے ہاتھ سے گھومتا ہوا ہلکا بال پھسل کر گول میں جا گرا تھا اور الجیریا کے گول کیپر بھی سلوینیا کے کھلاڑی کی ہلکی سے شاٹ بھی نہ روک سکے تھے اور گول کروا لیا۔

انگلینڈ کے وین روونی نے میچ سے پہلے کہا تھا کہ انگلینڈ الجیریا سے یہ میچ جیت جائے گا۔

انگلینڈ کے شاہی خاندان کے شہزادے، ولیم اور ہیری، بھی میچ دیکھنے کیپ ٹاؤن کے سٹیڈیم میں موجود ہیں۔