پکتیکاده قانلی هجوم یولگه قوییلدی
افغانستان ایچکی ایشلر وزیرلیگی ، پکتیکا ولایتی نینگ برمل اولوسوالیگیده یوز بیرگن گروهی خود کش هجوم نتیجه سیده ، 20 کیشی هلاک بولیب 50 کیشی یره لنگنینی تایید قیلگن.
توناون ساعت 8 آقشام اوچ انتحارچی کیشی لر ، بویوک بیر موترده اورنه تیلگن پارتله ش ماده لریدن فایده لب ، برمل اولوسوالیگده جایلشگن بیر سرک توزه توچی شرکتده کیریب اوز لری نینگ پارتله تگن لر.
ایچکی ایشلر وزیرلیگی ترقه تگن بیاناتی نینگ معلوم قیلیشی چه ، انتحارچی لر بیرینچی دن سرک توزه توچی شرکت سقلاوچی سی نینگ اوق بیلن اولدیریب ، مذکور شرکت محوطه سیده کیریب ، اوز لری نینگ پارتله تگن لر.
باشقه تماندن پکتیکا ولایتی نینگ حاکمی ولی صمیم مذکور حادثه ده یره لنگنلری آیساف و افغان داکتر لر تمانیدن تداوی بولیشینی معلوم قیلگن.
شونده ی بیرحالده افغانستان ایچکی ایشلر وزیرلیگی ، مذکور حادثه قنده ی یوز بیرگنی خصوصیده ، تیکشیریش ایشلرنی باشله گنی دن هم خبر بیرگن.
عین زمانده ، بگرام هوا قونالغه سی نینگ مطبوعات بولیمی هم بیر خبر نامه ترقه تیب ، هلاک و یره لنگن لر نینگ بری سی حربی سیز انسان لر بولگنی نی معلوم قیلگن. لیکن طالبان گروهی نینگ سوزلاوچی لریدن ذبیح الله مجاهد ، مذکور هجوم ، خارجی و افغان کوچلری قرار گاه لری نینگ بیریده یولگه قوییلگنی نی محلی مطبوعاتده ادعا قیلیب ، 21 تشقی و ایچکی کوچلر اوشبو هجوم نتیجه سیده هلاک بولگنی نی ایتگن.
اما طالبان گروهی نینگ مذکور ادعا سی ، محلی مقام لر تمانیدن رد ایتیلگن.
باشقه تماندن ، اوتگن کونی هم پکتیکا ولایتی نینگ برمل اولوسوالیگیده ناتو کوچلری تمانیدن یولگه قوییلگن هوایی هجوم نتیجه سیده ، اون طالب هلاک بولگن خبری هم ترقه تیلگن ایدی.
پکتیکا ولایتی نینگ برمل اولوسوالیگی ، پاکستان نینگ جنوبی وزیرستان منطقه سی بیلن اوزون چیگره سی بولیب ، اوتگن نیچه ییل جریانیده ، اوریش میدانیده ایله نیب قالگن.
