افغانستانده اوزبیک تیلی قنچهلیک رواجلنگن؟
افغانستان نینگ بیر قنچه تیل شناسلری اوزبیک تیلی، آخرگی بیش- آلتی ییل آره سیده مثلی کورینمه گن صورتده رواجلنتیریش ایشی دوام تارتیشینی اورغولماقده.
مذکور تیل شناس لر، اوزبیک تیلی انچه بای بولیب همده اوزبیک خلقی ایسه تاریخی جهت دن بویوک مدنیت گه ایگه ایکنلیگی اوستیده تاکید قیله دیلر.
اوزبیک تیل شناس لریدن عزیز الله ارال، اوزبیک خلقی اورته آسیا و حاضر گی افغانستان حدودیده قدیم دن بویان حیات کیچریشینی ایته دی.
"حاضرگی کونده قوللنه دیگن برچه تیل لر شو جمله دن اوزبیک تیلی هم جمعیت نینگ رواجی بیلن رواجلنیب باره دی و ترقیاتی بیلن ترقی ایته دی. اما افسوس که کیینگی 250-260 ییل مابینیده، افغانستانده اوزبیک تیلی اوز موقعینی بیر قدر یوقاتگنگه اوخشه یدی. بو هم اوشه زمانده آلیب باریلگن تورلی اجتماعی و سیاسی سبب لربیلن باغلیق. اوزبیک خلقی اورته آسیا و حاضرگی افغانستان حدودیده قدیم زمان لردن بویان، حیات کیچیریب کیلماقده."
ارال جنابلری شونگه قوشیمچه قیلیب، اوتگن اون ییل جریانیده بیر قنچه ایرکین رسانه لر تمانیدن اوزبیک تیلیده برنامه ترقه تیلیشی، مذکور تیل نینگ رواجلنتیریش توغری سیده ایجابی تأثیر قویگنینی معلوم قیلدی.
افغانستان باش قانونیده اوزبیک تیلی، اوچینچی رسمی تیل صفتیده تانیلگن. هرچند سونگی نیچه ییل جریانیده اوزبیک تیلینی رواجلنتیریش اوچون فرهنگ سیور شخص لر تمانیدن بیر قنچه سعی و حرکت لر یولگه قوییلگن، اما بیر قنچه اوزبیک لر ایسه مذکور تیل نینگ رواجلنتیریشی توغری سیده دولت تمانیدن هیچ قنده ی ایجابی حرکت یولگه قوییلمه گنینی ایته دیلر.
حاضر گی شرایط ده قره گنده ، بیر قنچه اوزبیک یاشلر ایسه اوزبیک تیلی حقیده ایریم نظر لری بار. اولر نینگ بیر قسمی اوزبیک تیلی نینگ رواجلنتیریش اوچون دولت ییتر لی زمینه یره تمه گنی نی ایتسه ده بیراق، کوپ گینه لری ایسه، اوزبیک تیلی نی آنه تیلی صفتیده سیو گن لری اوچون، مذکور تیلده گپیریش بیلن، اوز لرینی معنوی جهت دن، بای حس قیلیشی نی معلوم قیله دیلر.
اوزبیک یاشلریدن نور احمد یورتداش:
" حاضر افغانستانده اوزبیک تیلیده اونچه لیک بها بیریلمه گن. مملکتده اوچ اون ییلیک اوریش لر باعث، حاضر گی اوزبیک یاش لر اوز آنه تیل لرینی اونچه لیک بیلمه یدیلر. حاضرگی معما لرگه قره مه ی اوزبیک یاشلر آنه تیللری نینگ اورگه نیشگه قیزیقیش لری کوپه یگن. "
ایریم تیل شناسلر گه کوره، انسان نینگ آنه تیلی اوزیگه باشقه تیل لردن کوره شیرین راق و گوزه ل راق کورینه دی.
عین زمانده تیل شناسلر هر انسان نینگ ملی هویتی و ملی معنویتی بیرینچی ده او نینگ تیلی بیلن انیقلنیشینی ایته دیلر. شو اصلگه قره گنده هر بیر خلق اوچون تیل لر نینگ اینگ اعلی سی هم ، آنه تیلی نی یوزه گه چیقره دیلر.
تیل شناس لر بو نظر ده موافق بولیب کیلگن حالده، تیل لرنی یخشی تیل، یمان تیل، بویوک تیل و قشاق تیل گه اجره تیشینی نا توغری دیب تاکید له یدیلر.
