Россия: Михаил Ходорковский очлик эълон қилди
ЮКОС ширкатининг собиқ раҳбари ўзи ва ҳамкори Платон Лебедевнинг жазо муддатлари узайтирилганига норозилик белгиси сифатида очлик эълон қилган.
Бу ҳақда бир пайтлар Россиянинг энг бой одами бўлган жаноб Ходорковскийнинг ўзи Хамовнический туман маҳкамасининг мажлисида маълум қилган.
У ҳакамга қамоқ муддатининг узайтирилиши ҳақидаги қарор устидан шикоят аризасини топширган.
Ходорковскийнинг сўзларига кўра, у Президент Медведев нималар бўлаётганидан хабардор экани ҳақидаги тасдиқни олмагунича, очликни давом эттиради.
ЮКОС ширкати собиқ раҳбарининг норозилигига шу йил апрелида Россия Жиноят-процессуал кодексига киритилган ўзгаришлар сабаб бўлгани айтилмоқда.
Унга мувофиқ, иқтисодий жиноятларни содир этганликда гумон қилинаётган шахсга нисбатан қамоқ чорасини қўллаш ман этилади.
Ушбу ўзгаришлар шахсан Президент Медведев томонидан таклиф этилган ва куч тизимлари томонидан қўллаб-қувватланган эди.
Жаноб Ходорковский ва унинг ҳамкори Лебедевга нисбатан қамоқ муддатини узайтириш тўғрисидаги қарор улар 350 миллион тонна нефтни ўғирлаш ва пулларни ноқонуний ўзлаштиришда айбланган жиноят иши доирасида чиқарилган.
Ўтган жума қарорни эълон қилган ҳакам Михаил Ходорковский ва Платон Лебедев Россия Жиноят кодексининг оғир моддалари бўйича айбланаётганларини айтган.
Айбловлар
Маҳкаманинг сўнгги бир неча мажлисиларида нефт ширкатининг собиқ раҳбари ўзига қўйилган айбловнинг турли тафсилотларини рад этган.
Терговнинг фарази бўйича, Ходорковский ва Лебедев уюшган жиноий гуруҳ тузиб, ЮКОСга қарашли ширкатлар томонидан ишлаб чиқарилган қиймати 892 миллиард рублга тенг нефт маҳсулотларини ўғирлашган ва бир неча миллиард доллар маблағларни ноқонуний йўллар билан ўзлаштирганлар.
Айбловлар 1998-2004 йилларга тааллуқли.
Михаил Ходорковский ва Платон Лебедев 2005 йилда фирибгарлик ва солиқдан бўйин товлашда айбдор, деб топилиб, 9 йилга озодликдан маҳрум этилган эдилар.
Улар биринчи ва иккинчи маҳкамаларда ўзларига қўйилган айбларни рад этишган.
Жаноб Ходорковский ҳар икки маҳкама ишини "сиёсий" деб атаган.
Собиқ президент ва жорий Бош вазир Владимир Путиннинг танқидчилари уни Ходорковсийдан Россия мухолифати билан алоқалар учун қасос олганликда айблашади.
SMS рақамимиз: +447786201124
