Хўжандда милитсия идорасини портлатган ҳужумчи шахси аниқланди

Жорий ой бошида Тожикистоннинг Хўжанд шаҳрида портлаш содир этган худкуш ҳужумчининг шахси аниқланган.

Тожикистон Давлат миллий хавфсизлик хизматига кўра, бу ҳужум аслида хўжандлик, оғир жиноятда айбланиб, кейинги йиллар қидирувда бўлган Акмал Каримов исмли киши томонидан содир этилган.

У билан ҳамкорлик қилишда айбланиб қўлга олинган укасининг айтишича, Акмал Каримов милитсия бўлимини портлатиш учун яна икки киши билан тайёргарлик кўрган.

Ҳуқуқ-тартибот мулозимлари худкуш ҳужумга алоқадорликда кўрилаётган ҳар уч киши Ўзбекистон Исломий ҳаракати аъзолари бўлганини айтишади.

Хўжандлик 18 ёшли Фирдавс Каримовнинг айтишича, акаси Акмал Каримов худкуш ҳужумга икки шериги – Зариф ва Усто номли шахслар билан узоқ вақт тайёргарлик кўрганлар. Улар Хўжанддаги гаражлардан бирида портлатувчи моддаларни тайёрлашган. Фирдавс гараж атрофида пойлоқчилик қилган. Фирдавснинг айтишича, акаси унга аввалдан ички ишлар бошқармасининг уюшган жиноятчиликка қарши кураш бўлимини портлатиш нияти бўлганини маълум қилган.

Портлаш юз бергач, Акмалнинг шериги Зариф Фирдавсга қўнғироқ қилиб, жиҳод содир этилгани, энди Акмал тўғри жаннатга йўл олишини билдирган.

Фирдавснинг иқрори кеча оқшом Тожикистон марказий телевидениеси орқали қайта-қайта кўрсатилган.

Бу гал худкуш ҳужумни содир этган кишининг фақат Акмал Каримовнинг ўзи бўлгани ва ҳужумда ҳалок бўлган милитсия мулозимлари 3 нафар эканлиги айтилган.

Бир милитсия мулозими портлаш пайтида ҳалок бўлган.

Икки нафар милитсия мулозими беморхонада жон таслим қилган. Шунингдек 27 нафар милитсия мулозимининг яралангани билдирилган.

Акмал Каримовнинг акаси Илёс билан одамни гаровга олишда айбланиб, қидирувда бўлганликлари айтилади.

Уларнинг кичик укаси Фирдавснинг айтишича, Акмал жорий йилда тўсатдан ўзини Хўжандда эканлигини маълум этган ва кейинроқ укаси Илёснинг Афғонистонда эканини айтган.

Илёс Афғонистонда жиноят содир этиб, қўлга олинган.

Айрим кузатувчилар энди 18 ёшга тўлган Фирдавс Каримовнинг иқрорига оғир жиноят содир этишда айбланаётган жиноятчиларга шериклиги учун енгилроқ жазо бериш ваъдаси ёки қийноқлар сабаб бўлиши мумкин дейишмоқда.

Ҳуқуқ-тартибот мулозимлари Хўжанддаги худкуш ҳужумда Ўзбекистон Исломий ҳаракати қўли борлигини айтишаётган бўлса-да, олдинроқ бу ҳужумни ўзини "Ансорулоллоҳ жамоаси" деб атаган номаълум гуруҳ зиммасига олган эди.

Лекин расмийлар Тожикистонда бундай гуруҳ мавжуд эмаслигини айтишган.