Июн воқеалари юзасидан халқаро тергов натижалари яна бир ойга кечиктирилди
Аён бўлишича, ўтган йил Қирғизистон жанубида юз берган ва минглаб кишиларнинг умрига зомин бўлгани айтилган миллий низолар юзасидан олиб борилган мустақил халқаро текширув натижалари яна бир ойга кечиктирилган.
Тергов натижаларининг март ойи охирида эълон этилиши кутилаётганди.
Хабарларга кўра, қирғизистонлик масъуллар хулосаларнинг русча таржимасини сўраб, уларни ўрганиш учун кўпроқ вақт беришларини талаб этишган.
Халқаро мустақил тергов ҳайъати раҳбари финляндиялик Киммо Киллюниннинг айтишича, қирғиз томонидан энг кечи билан апрел ойи ўрталаригача ўз муносабатларини билдиришни сўраган.
Аммо жараённинг май ойи бошларигача давом этиши мумкинлиги эҳтимоли ҳам назардан соқит этилмаётир.
Жаноб Киллюнин Оврўпода Хавфсизлик ва Ҳамкорлик Ташкилоти Парламент Ассамблеяси президентининг муовинидир.
Лекин, шунга қарамай, олиб борилган халқаро мустақил тергов жараёни халқаро ташкилотнинг расмий текширувлари эмас, балки-да Қирғиз ҳукуматининг сўрови билан амалга оширилган ишдир.
Товон пули
Ўтган июн ойидаги этник низоларда қурбон бўлганлар қариндош-уруғларининг “Ош шейиттери” бирлашмаси ўша ҳодисаларга боғлиқ жиноий ишларни қайта кўриб чиқиб, ҳақиқий айбдорларни топиш ва ўлдирилган яқинларининг ҳар бири учун қирғиз пулига бир миллион сомдан (тахминан 25.000 АҚШ доллари) товон пули ажратиб берилишини талаб қилишмоқда.
Бугун улар билан яна бир бор учрашган ва бу хусусда ҳукумат йиғини ўтказган Қирғизистон Бош вазири Алмазбек Атамбаев давлат бюджетидан 500 миллион сом ажратиб беришни таклиф қилган. Ҳукумат аъзолари ҳам Бош вазир таклифини қўллаб-қувватлашган.
“Ош шейиттери” ижтимоий бирлашмасининг 30 га яқин аъзолари 22 мартдан буён пойтахт Бишкекдаги Ҳукумат уйи қаршисида норозилик намойиши ўтказиб келишмоқда.
Намойишчилар билан ўтган кун ҳам учрашган Бош вазир Алмазбек Атамбаев уларнинг талабларига қулоқ тутиб, қирғиз ҳукумати июн воқеаларида қурбон бўлганларнинг оилалари ва яқинларини қўлидан келганча ҳар томонлама қўллаб-қувватлаётганини билдирган.
Қирғизистон Бош вазирига кўра, ўзлариники бўлган ва хориждан келган барча инсонпарварлик ёрдамлари энг аввало Қирғизистон жанубига етказиб берилмоқда.
Жаноб Атамбаев, ўз ўрнида, ҳукумати, айниқса, июн ойидаги низоларда жабр кўрган оилаларга янада кўпроқ ёрдам бериш истагида эканини ҳам қўшимча қилган.
Қирғиз Бош вазири қирғин қурбонларига махсус расмий мақом берилиши эҳтимолини ҳам назардан соқит этмаган.
Намойиш иштирокчилари июн зўравонликларига айбдорларни албатта топиб, жазолаш, шу иш юзасидан қўзғатилган жиноий ишларни қайта кўриб чиқиш ва бедарак йўқолганларни топиб беришни талаб этишмоқда.
Уларга кўра, қурбонларга “Қирғизистон қаҳрамони” унвони ҳам берилиши лозим.
Мухлислармиз фикрлари:
Ўш яшовчиси:
Bular kechiktirildi deb vaqitni orqaga surishoradi. Jsha tekshiruvi ham ozlaridan bolsa ishonmiman lekin boshqa shahardan bolsaham ularni ham sotib olishga harakat qilishadi. Bular men masalan ularga ishonmiman halqaro tekshiruv haqona ish qilsa oshalarga ishonsa boladi, no tekshiruvni korib baho beramiz. Ularda ham uzbeklar ayibdor bolib chiqsa ularni ham sotib olibdi deb oylashgan boshqa iloj yoq manda. 1 yil bolyapdi hali ham oshda hayot onglanmagan oshdagilar oshni tinchib qolganiga hursand
