Британия матбуоти: 'Бин Лодин фарзандларини жиҳоддан қайтарган'

"Усама бин Лодин ўз фарзандларига Америкага бориб, тинч ҳаёт кечиринглар, деб айтган".

Шундай сарлавҳа остида Британиянинг "The Sunday times" рўзномасида Усама бин Лодиннинг қайниси Закариё ал-Садаҳнинг сўзлари келтирилган.

Унга кўра, "бин Лодин ўз фарзандлари билан невараларига Оврўпо ва Америкага бориб, таҳсил олишларини маслаҳат берган, уларни жиҳод йўлига кирмаслик билан огоҳлантирган".

Бин Лодиннинг ўлдирилишидан сўнг унинг яманлик Амал исмли бешинчи хотинининг укаси Закариё ал-Садаҳ Покистон расмийларига мурожаат қилган.

Покистон хавфсизлик хизмати ISI бин Лодиннинг уч хотини ва тўққиз боласини Исломободдаги кичик бир бинода сақлаб турганини маълум қилган.

Амалнинг Закариё ал-Садаҳга ҳикоя қилишича, ўлишидан олдин, бин Лодин ўн биринчи сентябр ҳужумлари унинг оиласига салбий таъсир қилгани айтган.

Ўзини дунёдаги энг қидирувда бўлган шахсга айлангани ҳақида афсусланиб гапирган.

Бундай пайтларда бин Лодин ўз болаларига Оврўпо ва АҚШ университетларида ўқишларини орзу қилганини айтган.

У "Сизлар тинчликда яшашларинг керак, мен қилган амалларга қўл урманглар", дея насиҳат берган.

Ўтган йили Америка аскарларининг бин Лодин оиласига қарши уюштирган ҳужуми уйдаги ёш болаларга катта руҳий жароҳат етқазган.

"Улар ҳануз эзилган аҳволда, ҳамма қатори ҳаёт кечиришдан маҳрум, қўрқувдалар, келажакда ўзларини нима кутаётганини билишмайди", деган Закариё ал-Садаҳ.

"Очиқ ҳавога чиқолмаганлари туфайли ҳаммасининг ранги сўлғин".

Бин Лодиннинг фарзандлари отасининг ўлимига гувоҳ бўлишган.

Ҳужум содир этилган пайтда болалари ва неваралари унинг олдига югуриб боришган .

Йигирма тўрт ёшли Закариё журналистика факультети талабаси.

Ўтган йили ноябрида Покистон томони таклифига биноан, опаси ва жиянларини Яманга олиб кетишни кўзлаб, Исломободга сафар қилган.

Яман мулозимлари уларни паспортлар билан таъминлашни ваъда қилганлар.

Бироқ, унинг опаси ватанга қайтиш борасида Покистон расмийларига қайта-қайта қилган мурожаатларига қарамасдан, хавфсизлик хизмати уларнинг яшаш шароитларини янада қийинлаштириб қўйган.

Покистонликларнинг назарида, бу аёллар бин Лодин оиласи, ёш болалари билан ҳарбий қисм олдида қандай қилиб бехавотир яшаганига оид муҳим тафсилотларни яшираётган бўлишлари мумкин.

Сўнгги тўрт ҳафта давомида Закариё ал-Садаҳга Покистон хавфсизлик хизмати ходимлари қариндошларини кўриш учун рухсат бермаган.

Ўтган пайшанба куни Закариё ал-Садаҳ мамлакат адлия вазири Ифтихор Чаудрига мурожаат қилганидан сўнг, унга опаси билан фақат телефон орқали боғланишга рухсат берилган.

Овозини эшитган жиянлари йиғлаб ундан "Биз сизни соғиндик, қачон бизни олиб кетасиз", дея сўрашган.

Закариё ал-Садаҳ ўзининг ички ишлар вазирлиги мулозимларига опаси ва жиянларини қўйиб юборилиши борасидаги мурожатлари эътиборсиз қолаётганини айтади.