Euro 2016: Бала Бейлга ўзгаради

Ҳа, бугун Англияга қарши майдонга тушажак юлдузи Гарет Бейл шарафига Уэльснинг шимолий Бала шаҳри маъмурияти худди шунга қарор қилибди.

Аммо "В" гуруҳи пешқадами ва Гарет Бейлнинг жамоаси Англияга қарши 2-тур учрашувини 1:2 ҳисобида ютқазди.

Ўйинда ҳисобни 42-дақиқада жарима тўпини қойилмақом тарзда амалга оширган Гарет Бейл очди.

Аммо 56-дақиқада Жейми Вардир ўйинда ҳисобни тенглаштирди.

Қўшимча вақтда Дэниел Старриж томонидан киритилган иккинчи тўп учрашув тақдирини ҳал қилди ва Англиянинг ғалабасини таъминлади.

Бугунги ғалабаси ортидан Англия "В" гуруҳи пешқадамига айланди.

Бу – Англиянинг Оврўпо чемпионлиги учун тўққизинчи бор кураши бўлса, Уэльс бу йилги биринчиликнинг дебьютанти саналади.

Аммо жамоа ўзининг юлдуз футболчиси, ҳозирда Испаниянинг “Реал” Мадрид қироллик клуби ўйинчиси Гарет Бейлга орқа қилмоқда.

Уэльс 1-тур учрашувлари ортидан Англия, Словакия ва Россия ҳам тушган “В” гуруҳи пешқадами эди.

Жамоа ўзининг Оврўпо чемпионатидаги илк иштирокини ғалаба билан бошлаган, гуруҳдаги дастлабки учрашувида Словакияни 2:1 ҳисобида мағлуб этганди.

Айнан Гарет Бейл 1-бўлимнинг 10-дақиқасида Словакия дарвозасига киритган тўпи билан ўйинда ҳисобни очиб берганди.

Уэльснинг ғалабаси билан тугаган ана шу учрашуви ортидан жамоаси Бейлни майдоннинг ўзидаёқ олқишларга кўмиб ташлаган, унинг ана шу ҳолати акс этган суратлар эса, аксарият британ нашрларининг спорт саҳифалари юзини безамай қолмаганди.

Оврўпо чемпионатида қанчалик катта тажрибага эга эканига қарамай, Англия ўзининг Россияга қарши илк учрашувида 1:1 дуранг ҳисоби қайд этганди.

Баладан Бейлга

Уэльсдан олинган энг сўнгги хабарлардан аён бўлишича, миллий терма жамоанинг Англияга қарши бугунги ўйинига мослаб шаҳарга йўл кўрсатувчи тўртта асосий белгининг барчасида Бала Бейл, деб ўзгартирилади.

Шаҳар кенгаши раиси Дилвин Морган ҳам бу ташаббусни “100 фоиз қўллаб-қувватлаши”ни билдирган.

Хабарларга кўра, Уэльс Оврўпо чемпионатидаги иштирокига якун ясагунига қадар Бала Бейллигича қолаверади.

Жаноб Морганнинг айтишича, “бу – Гарет Бейлга ўз ҳурматларини бажо келтириш ва бу йилги Оврўпо чемпионлиги учун курашаётган Уэльс миллий терма жамоасини қўллаб-қувватлашнинг энг қойилмақом йўли бўлган”.

“Гарет Бейл халқаро миқёсдаги спорт юлдузи ва бу амалимиз Бала, йўғ-эй, кечирасиз, Бейлни жаҳон харитасига қўяди”, - деб айтган шаҳар кенгаши раиси.

Маҳаллий “Y Cyfnod” нашри Бош муҳаррири Мэри Уильямс наздида, “мазкур ҳолат уэльслик футбол мухлисларининг ўз миллий терма жамоалари деб нималарга тайёр эканликларига ҳам далолат қилади”.

Гарет Бейл

Уэльс миллий терма жамоаси ва “Реал”(Мадрид) клуби юлдузига бугунги рақиблари – Англия футболи ҳам бегона эмас.

Бейл “Реал”(Мадрид) ўзини рекорд сумма – 100 миллион еврога сотиб олган 2013 йилнинг сентябрига қадар Лондоннинг “Тоттенхэм” клубида тўп сурган.

Яъни, олти йил давомида Лондонда “ниқталар” шарафини ҳимоя қилган.

“Тоттенхэм”га ўтмасидан аввал эса, Англиянинг бошқа бир – "Саутхэмптон" клубида ўйнаган.

“Тоттенхэм” сафида экан, рақиблари дарвозасига бир мавсумнинг ўзида 26 та тўп киритиб, “Англиянинг энг яхши футболчиси” бўлишга ҳам улгурган.

2014 йилда жаҳон футболи юлдузи Лионель Мессини ортда қолдириб, “Реал”даги жамоадоши Криштиану Рональду билан бирга УЕФА таснифида "Йилнинг энг кучли терма жамоаси" сафига ҳам кирган.

Гарет Бейлнинг маҳорати шу кунларда мезбон Францияда миллий терма жамоага Бош бўлгани қолиб, англиялик қолган номдор мураббийларни ҳам анчайин ўйлантириб қўйган.

Ўзларининг Рунейларига қиёс беришаётган эса-да, улар Англиядан туриб Бейлга майдонда қандай қилиб бас келиш мумкинлиги масаласини ошкора муҳокама этишгача боришган.

Бугун яна Олмония-Польша (17:00 бв.) ва Украина-Шимолий Ирландия(20:00 бв.) ҳам ўзларининг гуруҳдаги 2-тур учрашувларини ўтказишади.

"С" гуруҳида дастлабки учрашувларини ғалаба билан якунлаган амалдаги жаҳон, уч карра Оврўпо чемпиони Олмония ва Польша пешқадамлик қилиб туришибди.