Диктатордан не қолди - вайрона, ғазабнок ёшлар ва низоларми?

Ливияни узоқ йиллар бошқарган яккаҳоким ва юракларга ваҳшат солган Муаммар Қаддофийдан бугун нима қолди деган савол кўпларни ўйлантиради.

Айримлар наздида, Президент Қаддофий чорак асрдан кўпроқ ўз халқини қўрқув ва сиёсий қолоқлик исканжасида ушлаб келган бўлса-да, иқтисодий жиҳатдан нефтга бой Ливия анча фаровон эди.

Аммо мамлакатда илдиз отган коррупция, таниш-билишчилик ҳамда сиёсий элита яқинларининг битмас-туганмас бойликларга эга эканлиги халқни ҳар вақт норози этиб келарди.

Араб баҳоридан руҳланган Ливия халқи исён кўтаргач, минтақадаги йирик мамлакатлардан бирида тинчлик-барқарорликни ўрнатиб келганини айтган қудратли раҳбар тақдири ўта аянчли тугади.

Табиий бойликларга эга бу мамлакатда тузум алмашиниши йўлида ҳатто НАТО ҳам илк бора ўз масъулияти доирасидан четга чиқиб, ҳаракат қилди.

Аммо уни кетказишда катта куч бўлиб хизмат қилган ливиялик ёшлар ҳамон мақсадлари амалга ошмагани, янги тузумда ҳам уларнинг сиёсатда иштирок этишларига йўл берилмаётгани ҳақида айтишади.

Яккаҳоким раҳбар яратган сиёсий бўшлиқни тўлдиришга қийналаётган мамлакат анча нотинчлашган ва ҳалигача иқтисодий ҳамда сиёсий жиҳатдан ўзига келолгани йўқ.

Ҳатто собиқ президентнинг қуш ҳам учиб киролмайдиган саройи вайроналари ҳамон бир уюм тупроқ бўлиб турибди.