Тўрт йиллик орзиқишлардан сўнг Жанубий Африкада 2010 йилги Жаҳон чемпионати старт олди

2010 йилги Жаҳон чемпионати атрофидаги гап-сўзлар бундан тўрт йил бурун қайнашни бошлаганди.

Чунки мезбонлик чемпионат тарихида илк бор Африка қитъаси вакили - Жанубий Африкага ўтганди.

Бундан аввалги чемпионатга мезбонлик ҳуқуқини энг сўнггига келиб Олмониянинг илиб кетиши асосий даъвогар Жанубий Африка у ёқда турсин, кўпчиликнинг ҳам оғзини ланг этиб очиб қўйганди.

Футболсеварлик бобида Африка дунёнинг бирор бир қитъасидан қолишмаса, дунёнинг энг наҳанг клубларини манаман деган юлдузлар билан таъминлаб қўйган бўлса...

Болалари эртаю кеча кўчаларда тўп суриб, африкаликларнинг футбол дарди борасида ортиқча изоҳга ҳожат қолдирмаган бўлса.

Шу сабаб бу қандай адолатсизлик, дегувчиларнинг сони ҳам ҳақли равишда озмунча эмасди...

Бугун Жанубий Африкада қад ростлаган бир-биридан ҳашаматли стадионлар, энг замонавий русумдаги аэропорт, тезкор поездлар тизими ҳам қитъанинг энг йирик спорт тадбирига мезбонлик қилишга қанчалик қодир эканига далолат қилса...

Яна Жаҳон чемпионатига мезбонлик баҳона Жанубий Африка дунёнинг манаман деган давлатларини “ўтқизтириб қўйган” башарий молиявий инқироздан омон қолса!..Миллиардлаб долларлик харажати ҳам писанд бўлмаса!

Жаҳон чемпионатидан ҳали биринчилик тарихида кузатилмаган даражада тушум келишини кутаётган бўлса...

Ҳам даромад, ҳам буромад деб шуни айтишса керак-да!

Жароҳат, жароҳат, жароҳат

2010 йилги Жаҳон чемпионати атрофида яна гапларни қайнатгани - манаман деган юлдузларнинг шундоққина биринчилик арафасида жароҳат олишлари бўлди.

Олмония, Фил Суяги қирғоғи каби дунёнинг энг етакчи миллий терма жамоалари айнан олган жароҳатлари боис сардорларидан маҳрум бўлиб ўтиришса!

36 ёшни қоралаб қолган Михаил Баллак 100-бор халқаро майдонга тушиш бахтидан мосуво қолган бўлса, миллионлаб ишқибозлар Девид Бекҳамни яна бир бор кўриш имкониятидан...

Яна бу рўйхатнинг узайиб бораётганига нима дейсиз: Дидье Дрогба, Майкл Эссьен, Лассана Диарра, Рио Фердинанд, Андрес Иньеста,..мураббийларию ишқибозларининг юракларини ҳовучлатса...

Рональдиньо, Руд ван Нестерлой, Хавьер Занетти, Эстебан Камбьяссоларнинг ўз жамоалари сафларига олинмагани эса, куйган юракларни янада куйдирса...

Бу галги чемпионатда деярли бир овоздан барча футболчилар ва дарвозабонларнинг ўзларини ёндиргани эса, ҳамма нарса қолиб, "Адидас" ширкати томонидан ишланган тўп бўлса!

Дунёнинг манаман деган ҳужумчию дарвозабонлари бераётган баҳоларга кўра, тўп ўзлари учун "ҳақиқий фалокат" ва "даҳшат"дир. Ва бундай сифатдаги тўпни истаган супермаркетдан сотиб олиш мумкин.

Бироқ “Адидас” ширкатининг рад этишича, ўз фаолиятлари давомида бунчалик мукаммал, силлиқ ва думалоқ тўп ишлашмаган.

Қай бир томоннинг даъволари рост ёки ёлғон эканини эса, энди бугундан бошлаб чемпионат беллашувлари амалда исботлайди.

2010 йилги Жаҳон чемпионати унда бирор бир собиқ Шўро давлатининг иштирок этмаётганлиги билан ҳам тарихда қолади. Чунки бунақаси Жаҳон чемпионати тарихида камдан-кам бўлади.