Буёғи қандоқ бўлди: 'Саккизоёқ Паулни ўлдир' ёки Паул қачон ўлган?
Саккизоёқ Паулнинг жасади совумай туриб, унинг ўлимию, қойилмақом фолбинлиги атрофидаги гаплар қизигандан қизиган.
Бу гал ҳам гапни қизитган дунёнинг энг номдор нашрлари бўлишган.
Ҳаммасига сабаб эса, саккизоёқ Паулни ипидан игнасигача, ибтидосидан интиҳосигача савол остига олувчи янги Хитой фильми бўлган.
Хитойлик кинорежиссёр Шио Жянгнинг "Саккизоёқ Паулни ўлдир" фильми ҳали катта экран юзини кўрмай туриб, ўзининг даъволари билан Паулга бефарқ бўлмаган барчанинг ақлини шошириб, бошини шиширган.
Хитойлик фильм устасининг ҳаммаси қолиб, Британиянинг энг нуфузли "Гардиан" газетига айтишича, Паул қанчадан қанча мухлисларини йиғлатиб, ўтган душанба куни эмас, уч ой олдин ўлган.
Режиссёр Жянг хонимга кўра, саккизоёқ Паулнинг июл ойида ўлгани ва аквариум эгалари томонидан бошқа саккизоёқ билан алмаштириб қўйилганига ишончи 100 фоиз бўлмаса-да, 70 фоизча комилдир.
Хитойлик фильм устаси ўз сўзларининг исботига ҳам куттириб ўтирмаган: "Саккизоёқларнинг ҳаммаси бир-бирига қуйиб қўйгандек ўхшаш бўлса, яна нима истайсиз?" дея гапни чўрт кесган.
"Биз саккизоёқ Паул фолбинлигининг тагига етиш учун фильм яратиш аҳдида жуда кўп текширувлар олиб бордик. Бу хусусда Олмониядаги аквариум соҳиблари билан гаплашганимизда, улар қанақадир қўрқувга тушиб, асабийлашиб қолгандек кўринишди бизга. Паул 9 июл куни, Жаҳон чемпионатининг финал учрашувига бор-йўғи 2 кун қолган бир пайтда ўлган бўлиши керак," дейди режиссёр.
Паул ўзининг бир тутам ҳаётини кечирган Олмониядаги аквариум эгаларининг қайта-қайта ишонтиришларича, айтилаётган гапларнинг барчаси ёлғон ва машҳур фолбинлари ёзда ўлмаган.
"Саккизоёқ Паулни ўлдир"
Хитойлик ижодкорларнинг янги фильмларида халқаро гаровгирлик фитнасини очиб ташлаш учун Жанубий Африкага йўл солган бир гуруҳ хитойлик ишқибозлар ҳақида сўз боради.
"Шахсан мен Паулнинг фолбинлик маҳоратига ишонмайман. Аммо унинг атрофидаги шов-шувлар Жаҳон чемпионатига бўлган қизиқишни кучайтиришда мислсиз ҳисса қўшгани аниқ," дейди Жянг хоним.
Асли жанубий англиялик бўлган саккизоёқ Паул сўнгги Жаҳон чемпионатида Олмония иштирокидаги барча учрашувлар ва бўлажак жаҳон чемпиони ким бўлишини тўппа-тўғри башорат қилиш билан бутун дунёда тилга тушганди.
"Паул саккиз учрашувдан барчасининг натижасини тўғри башорат қилиб, рекорд қўйган эмиш. Бунақаси бўлиши мумкин эмас. Саккизоёқнинг ақллилик бобида одам боласига етишига йўл бўлсин. Паулнинг фолбинлиги билан боғлиқ шов-шувларнинг барчаси жуда ҳам пухта ишланган режадир. Миллионлаб одамлар ана шу режага учиб ўтиришибди. Паулнинг жуда ҳам ёқимтойлиги уларга янада қўл келган," дея сўзларида давом этади хитойлик режиссёр.
Жянг хоним, Паул сўнгги фолида, ҳатто, ўзининг ўлимини ҳам аниқ башорат қилганига оид гап-сўзлар ҳам бир тийинга қиммат эканини айтади.
Агар бу миш-мишлар тўғри бўлса ҳам, уни Паулдан бўлак ҳеч кимса билмаган, шундай экан, бунга нима дейсиз, дея бўш келмаган хитойлик ижодкор.
Марҳум саккизоёқнинг жасади эса, келаси бир неча кун ичида кремация этилади. Сўнгра ҳоки махсус қутичага солиниб, атайин ўзи учун барпо этилган, портрети қўйилиб, ҳаёти акс этган видео лавҳалар ўйнаб турувчи мақбарага қўйилади.
Айтилишича, Паулнинг фолбинлиги сирини очиб ташлашни мақсад қилган фильм 30 ноябр куни намойиш этилади.
