Туркия: курд бўлгинчилигини дастаклашда айбланганлар маҳкамада
Туркияда курд бўлгинчиларини дастаклашда айбланаётган 151 киши устидан маҳкама жараёни бошланган.
Туркия жануби-шарқидаги Диёрбакир шаҳар маҳкамасида ҳозир бўлганлар шу йил апрелидаги амалиётлар чоғида ҳибсга олинганди.
Айбланувчилар орасида 12 нафар собиқ шаҳар ҳокимлари ҳам бор.
Уларга ноқонуний ташкилотни қўллаб-қувватлаш ва унга аъзолик айблари қўйилган.
Бу ўринда террорчи ташкилот, деб номланган Курдистон Ишчилар Партияси (ПКК) назарда тутилмоқда.
Маҳкамани кузатаётган Би-би-си мухбири Жонатан Хэдга кўра, барча айбланувчиларни бир хонага сиғдириш учун янги катта маҳкама зали қурилган.
Мухбиримизнинг айтишича, айбланувчиларнинг кўпчилиги янги ташкил этилган Курд фуқаро ҳаракатининг фаолларидир.
ПКК нинг қуролли кампанияси сўнгги йилларда муваффақиятсизликка учраши ортидан ушбу ҳаракат тобора кучланиб борган.
Туркия жиноий қонунчилиги курд бўлгинчилари ташкилотини оғзаки қўллаб-қувватлаш учун ҳам жуда қаттиқ жазо чораларини назарда тутади.
Ҳозирда маҳкамага тортилганларнинг баъзиларига умрбод қамоқ жазоси берилиши мумкин.
Музокаралар
Туркиянинг жорий ҳукумати мамлакат жануби-шарқидаги курд можаросини тинч йўллар билан ечишга ваъда берган.
Аммо инсон ҳуқуқлари гуруҳларига кўра, ўтган йилдан буён олиб борилган амалиётларда бир ярим мингдан ортиқ курд фаоллари ҳибсга олинган.
Бу эса турк ҳукумати курдларнинг ҳаракатини тор-мор қилишга бел боғлаганидан далолат беради, дейди Анқарадаги мухбиримиз.
Аммо шу билан бирга, Туркиянинг айрим давлат мулозимлари қамоқдаги курд исёнчилари раҳбари Абдуллоҳ Ўжалан билан музокара олиб бораётганлари хабар қилинган.
Бундан ташқари Туркия қўшнилари - Ироқ ва Сурия билан ҳам курд бўлгинчилигига барҳам бериш масаласини муҳокама этган.
Таҳлилчиларга кўра, бу Туркиянинг курд бўлгинчилиги масаласида бирданига икки жабҳада ҳаракат қилаётганини кўрсатади.
Бир томондан, мамлакат ичидаги курдларга қаттиққўллик, иккинчи томондан эса, Туркия чегараларидаги курд жангчиларини қуролларини ташлашга ундаш.
Курд бўлгинчиларига қарши жанглар Туркияда 30 мингдан ортиқ одамнинг ёстиғини қуритган.
