Американи уялтирган Wikileaks.org веб-саҳифаси бошқа манзилга ўтди
Бундан буёғига дунёга машҳур Wikileaks веб-саҳифаси Wikileaks.ch (Швейцария) домени остида фаолият юритади.
Бунга веб-саҳифа шу пайтгача хизматидан фойдаланиб келаётган EveryDNS номли Америка ширкатининг улар билан ортиқ ҳамкорлик қилмаслик қарори сабаб бўлган.
Америка ширкатига кўра, оммавий киберҳужумлар бошқа фойдаланувчиларининг мўътадил ишлашларига таъсир қилаётгани учун бу каби қарорга келишган.
Wikileaks сўнгги пайтларда дунёнинг қатор давлатлари ҳукуматлари ва айниқса, Америка Қўшма Штатларининг роса ғазабини тоширган бир қатор махфий ҳужжатларни эълон қилганди.
Веб-саҳифа маъмурияти эса, Twitter тармоғидаги саҳифаси орқали "Америка ширкати ўз доменларининг бошига етганини" билдирган.
Энди эса, истовчиларнинг веб-саҳифага Wikileaks.ch манзили орқали киришлари мумкин бўлади.
Бундан ташқари, кеча Wikileaksга маълумотларини сақлашда хизмат кўрсатиб келаётган Американинг Amazon.com ширкати ҳам веб-саҳифа билан ҳамкорлигини тўхтатганди.
Айрим америкалик сенаторлар веб-саҳифага хизмат кўрсатаётган барча ширкат ва ташкилотларни улар билан алоқаларини узишга даъват этишганди.
Wikileaksнинг айтишича, махфий ҳужжатларни чоп этишни бошлашгандан буён бошлари бу каби ғалвалардан чиқмай келмоқда.
Веб-саҳифанинг, айниқса, Америка томонининг кенг жамоатчиликка мўлжалланмаган дипломатик ёзишмаларини ошкор этиши бутун дунёда катта шов-шувларга сабаб бўлмоқда.
АҚШ Давлат департаментининг Wikileaks томонидан фош этилган 250 мингга яқин ҳужжатларида дунёнинг кўплаб сиёсий раҳбарлари номлари келтирилган.
Эълон қилинган ҳужжатларда Ўзбекистон дохил қатор Марказий Осиё давлатлари хусусида ҳам сўз боради.
Дейлик, Wikileaks АҚШнинг Ўзбекистондаги элчиси Жон Пурнеллнинг элчилик муддати тугаши олдидан ёзган мактубини ҳам келтиради.
Жаноб Пурнелнинг ёзишича, Ўзбекистон сиёсий ва иқтисодий ҳаётни монополиялаштириб олган унчалик катта бўлмаган оилалар гуруҳининг манфаати учун фаолият юритадиган постсовет полиция давлатидир.
Туркманистон Президенти Гурбангули Бердимуҳаммедов эса, "ҳаммадан гумонсирайдиган", "калтафаҳм" ва “қип-қизил ёлғончи”, дея таърифланади.
Веб-саҳифа бундан аввал Американинг Ироқ ва Афғонистонга оид кўплаб махфий ҳарбий ҳужжатларини ошкор этганди.
