Украинанинг собиқ президентига қарши жиноий иш очилган

Украина Бош Прокуратураси мамлакатнинг собиқ президенти Леонид Кучмага қарши жиноий иш қўзғатилганини тасдиқлади.

Бош прокурор ўринбосари Ренат Кузьминнинг мухбирларга айтишича, жиноий иш мухолифатчи журналист Георгий Гонгадзенинг ўлими тергови билан боғлиқликда очилган.

"Кучма Леонид Данилович Ички Ишлар Вазирлиги ходимларига журналистнинг ўлдирилиши каби оқибатларга олиб келган ноқонуний буйруқларни беришда ва ўз ваколатини суиистеъмол қилганликда гумон қилинади", - деди Кузьмин.

Жаноб Кузьмин, шунингдек, собиқ президентдан мамлакатдан чиқиб кетмаслик борасида тилхат олинганини билдирди.

"Кучма Леонид Даниловичга Украина ҳудудидан чиқиш чекланган, бу борада Давлат чегара хизматига кўрсатма берилган", - деди Кузьмин жаноблари.

Унинг айтишича, Гонгадзе ўлими бўйича очилган тергов "интенсив суратларда олиб борилмоқда".

Бироқ, Кучма жанобларига расман айблов қўйилмаган.

Президентникига ўхшаш овоз

Леонид Кучма Украинани 1994 йилдан 2005 йилгача бошқарган.

Таниқли журналист, гуржи диссидентнинг ўғли Георгий Гонгадзе 2000 йилнинг 16 сентябрида Украина пойтахтидан ўғирлаб кетилганди.

Кўп ўтмай унинг бошсиз танаси Киевдан узоқ бўлмаган ўрмонда топилган.

Бош прокуратура тарқатган расмий маълумотга биноан, қотилликни буюрган асосий шахс - Украина Ички Ишлар Вазирлигининг собиқ раҳбари Юрий Кравченко, қотилликда бевосита иштирок этган шахс эса - милиция генерал-лейтенанти Алексей Пукач.

Гонгадзе ишида гўёки собиқ президентнинг идорасида ёзилган аудиотасма ҳам бор.

Тасмада Кучманинг овозига ўхшаш овоз журналист билан "шуғулланиш"га буйруқ беради.

Жаноб Кучманинг ўзи Гонгадзе қотиллиги борасидаги ишни халқаро провокация деб ҳисоблайди. Унга кўра, Ғарбдаги баъзи сиёсий доиралар ва махсус кучлар Киевни гижгижламоқчи.

У Гонгадзе иши атрофида "шовқин кўтараётган провокаторлар"дан бири дея АҚШнинг Марказий Разведка Бошқармасини атаган.