'Япониядаги атом иншооти инқирозига 9 ой ичида барҳам берилади'
Сурат манбаси, BBC World Service
Токио Электр Қуввати ширкати Япониянинг "Фукусима-Дайичи" атом электр станциясидаги инқирозни 9 ой ичида назорат остига олишини айтган.
Ширкат аввалига ядровий иншоотдан чиқаётган радиация миқдорини камайтиришни мақсад қилган. Бу ишни 3 ой ичида амалга оширилиши айтилмоқда. Реакторларни совутишга эса, яна 3-6 ой керак бўлади.
Бу ҳақда Токио Электр Қуввати раҳбари Тсунеҳиса Катсумата Токиода берган матбуот анжуманида билдирган.
Шунингдек, 11 март кунги қақшатқич зилзила келтириб чиқарган цунамидан шикаст етган реактор биносини ўраш ҳам режаланмоқда.
Ширкат раҳбари Тсунеҳиса Катсуматага кўра, режа атом электр станцияси атрофидан кўчирилган ўн минглаб одамларнинг имкон қадар тезроқ уйларига қайтишларига изн беради.
Тсунеҳиса Катсумата аҳолидан "келтирилаётган кўнгилсизликлар учун сидқидилдан узр" сўраган.
"Биз инқирозни янада ёмонлашишини олдини олиш йўлида қўлимиздан келган барча ишни қилмоқдамиз", деб айтган у.
Жума куни 2 - реактор яқинидаги денгизда радиация даражаси 6,500 баробарга кўтарилгани хабар қилинганди. Токио Электр Қуввати ширкатига кўра, бу бир кун олдингига қараганда 1,100 мартага кўпдир.
Радиация даражасининг ортиши янги радиоактив моддалар чиқаётган бўлиши мумкинлиги борасидаги қўрқувларни оширган.
Фавқулодда ёрдам ходимлари инқироз бошланганидан бери бирон бир реактор биносига киришга муваффақ бўлишмаган.
Буларнинг бари Қўшма Штатлар Япониядаги қайта қуриш саъй-ҳаракатларини қўллаб - қувватлашга ваъда берган пайтда кузатилмоқда.
Беш ҳафта муқаддам юз берган зилзила ва цунами қарийб 14,000 инсоннинг умрига зомин бўлган ва яна 14,000 киши бедарак кетган.
