Владимир Путин Яқин Шарққа сафарини бошлаган

Россия Президенти Владимир Путин март ойида сайланганидан буён Яқин Шарққа илк сафарини Исроилдан бошламоқда.

Бош вазир Бенжамин Нетаняху билан музокараларнинг асосий мавзуси Исроилнинг Эрон ядровий дастури борасидаги хавотирлари ҳамда Суриядаги вазиятга қаратилиши кутилмоқда.

Исроил ва Россия ўртасида мустаҳкам маданий алоқалар мавжуд бўлиб, бу ерда собиқ Иттифоқдан келган миллиондан ортиқ киши истиқомат қилади.

Мухбирларга кўра, икки давлат ўртасидаги сиёсий муносабатлар кўп ҳолларда зиддиятли кечган.

Владимир Путин тўрт йил бош вазир бўлганидан сўнг шу йил яна президентлик вазифасига қайтган.

Сешанба куни жаноб Путин Фаластин мухторияти раҳбари Маҳмуд Аббос билан музокара олиб борганидан сўнг, Иорданияда қирол Абдулла билан учрашиши айтилган.

Сафар давомида Россия президенти иккинчи жаҳон урушида ҳалок бўлган рус аскарлари хотирасига атаб қурилган ҳайкалнинг очилиш маросимида қатнашади.

Шундан сўнг, жаноб Путин русий забон ташқи ишлар вазири Авигдор Либерман, президент Шимон Перес ва бош вазир Бенжамин Нетаняху билан учрашади.

Россия президентининг сафари олдидан Исроил ташқи ишлар вазири Авигдор Либерман Интерфаксга берган интервьюсида "Россия билан жуда ишончли алоқалар" шаклланганлигини ва шу боисдан ҳам Москва Исроилнинг Сурия ва Эрон борасидаги мавқеъини тушунишига умид қилаётганини айтган.

" Суриядаги вазият мавҳум, ҳеч нарсани англаб бўлмайди, ким ва қачон ҳукуматга келиши номаълум, бу бизнинг хавотирларимизни янада оширади. Шунинг учун яширмайманки, Сурияга қурол етказилиши биз учун оғриқли мавзу",- деган жаноб Либерман. " Ливияда Муаммар Қаддофий ағдарилгач, катта миқдордаги Ливия қуроллари Ғазо минтақасига оқиб кела бошлади, бу жуда ташвишли", - деб таъкидлаган у.

Жаноб Либерманга кўра, Эрон ядро лойиҳалари ҳақидаги музокаралар ҳам бир бурчакка тиқилиб қолган. Шу сабабли Исроил учун "олтилик" аъзоси сифатида Россиянинг фикрини билиш қизиқарлидир.

Ўз навбатида Владимир Путин Исроилнинг Эрон ядро объектларига ҳарбий ҳужуми " ҳақиқатдан фожеали" бўлишини билдирган.

Кўпчилик исроилликлар Россияни Эрон ядро объектларини қурилишига кўмак берганликда айблашади.

Россиядан қурол-яроғ оладиган Суриядаги инқироз алоҳида мавзу саналмоқда.

Исроил расмийлари инқироз ҳақида омма олдида фикр билдиришмаган.

2005 йил Россия президенти бўлган Путин Исроилга биринчи бор сафар қилган.

У шунингдек Ғарбий соҳил ва Мисрга ҳам ташриф буюрган.