Украина: намойишчилар Адлия вазирлигини эгаллаб олганлар
Сурат манбаси, Reuters
Киевда "Спильна справа" ҳаракати фаоллари Адлия вазирлиги биносига кирганлари хабар қилинмоқда.
Якшанба куни Марказий Украинанинг кўп шаҳарларида ҳукуматга қарши норозиликлар маҳаллий ҳокимият биноларини босиб олиш билан давом этди.
Адлия вазирлиги якшанба куни кечқурун "Спильна справа"(Умумий иш") аъзолари томонидан эгаллангани ҳақида ҳаракат раҳбари Александр Данилюк билдирди.
Украина Адлия вазири Елена Лукаш аксилҳукумат намойишчилар вазирлик биносини зудликда бўшатмасалар, мухолифат билан музокараларни тўхтатиб, мамлакатда фавқулодда ҳолат эълон қилиниши ва чоралар кўришни сўрашини айтган.
"Мен Украинадаги ҳозирги мураккаб вазиятни ҳал қилиш ишчи гуруҳида қатнашяпман. Агар вазирлик биноси тезликда бўшатилмаса, президентга музокаралар жараёнидан чиқишни сўрашга мажбур бўламан. Шунингдек Хавфсизлик хизматига фавқулодда ҳолат бўйича мурожаат қилишимга тўғри келади", деб айтган Елена Лукаш журналистларга.
Лукаш хонимнинг айтишича, вазирликда Конституциянинг 2004 йилги нусхасига қайтиш ва амнистия масаласи муҳокама қилинаётган бўлган.
Намойишчилардан бинони тарк этишни сўраган УДАР партияси етакчиси Виталий Кличкога улар рад жавобини беришган.
"Бизнинг бинони тарк этмаслигимиз сабаби оддий: марказий ҳокимият бугун қонуний эмас... Биз у ерга Украина учун ишлаётганларни қўямиз, диктатурани ўрнатувчиларни эмас", деб айтган " Александр Данилюк.
Фаоллар вазирлик биноси атрофига қор тўлдирилган қоплар ва ахлат қутиларини териб тўсиқ ўрнатишган.
Украина Ички Ишлар вазирлиги билдиришича, Киев шаҳар милицияси Адлия вазирлигини ноқонуний босиб олиш бўйича жиноий ишни ўрганмоқда.
"Спильна справа" ҳаракати аъзолари олдинроқ Қишлоқ хўжалиги, Энергетика вазирликлари биноларини ишғол қилган эдилар.
Якшанба куни норозилик намойишлари Украинанинг Днепропетровск, Запорожье каби катта шаҳарларида давом этган.
Ҳозирда Украинадаги 10 вилоятда намойишчилар маҳаллий ҳокимият биноларини қўлга олиб турибдилар.
Донецк ва Одессада Президент Янукович тарафдорлари жамоатчилик тартибини ҳимоя қилиш гуруҳларини ташкил қилганлар.
Икки мингга яқин киши маъмурий идораларни намойишчилар босиб олишидан қўриқлаш истагини билдирган.
