Ангела Маркел Оврўпони АҚШ жосуслигидан ҳимоялашни таклиф қилди

Олмония канцлери Ангела Маркел шахсий маълумотларни Америка махфий хизматларидан ҳимоя қилиш учун ягона Оврўпо алоқа тизими яратиш кераклигини айтган.

Ушбу лойиҳа амалга ошадиган бўлса, оврўполик фойдаланувчиларнинг рақамли маълумотларини кузатишдан сақлаш имконини беради.

Маркел хоним бу таклифини Франция Президенти Франсуа Олланд билан учрашувда муҳокама қилмоқчи.

Америка жосуслик хизмати собиқ таҳлилчиси Эдвард Сноуден томонидан АҚШ хавфсизлик хизматлари иттифоқчи мамлакат раҳбарлари дохил, миллионлаб интернет фойдаланувчилар маълумотлари ва телефон қўнғироқларни эшитгани ошкор қилиниши Оврўпода кўпларни дарғазаб қилганди.

Телефон сўзлашувлари узоқ муддат Америка томонидан эшитиб келинган Ангела Маркел АҚШ билан оврўполик ҳамкорлари ўртасидаги муносабатларда ўзгаришлар зарурлигини таъкидлаган.

Ангела Маркелга кўра, Facebook ва Google интернет тармоқларининг ваколатхоналари шахсий маълумотлар ҳимояси қониқарли даражада бўлмаган мамлакатларда амал қилиши, айни пайтда бу йирик интернет ширкатлар хавфсизлик чоралари юқори мамлакатларда бизнес олиб бориши номутаносибдир.

"Биринчи навбатда биз фуқароларимизнинг хавфсизлигини таъминловчи Оврўпо провайдерлари ҳақида ўйлашимиз лозим. Бу мақсадда Оврўпо ичкарисида коммуникацион тизим пайдо қилиш мумкин", дейди Маркел хоним.

Хабарларга қараганда, расмий Париж Олмония канцлерининг таклифини қувватлаш ниятида.

Мамлакатлар ўртасида жосуслик хизматлари амал қилиши аслида янгилик эмас.

Хусусан Олмониянинг ўзида фашистлар тузуми даврида ҳам, коммунистлар ҳукмронлигида ҳам кенг фойдаланилгани ҳужжатлардан маълум.

Олмония раҳбарларининг шахсий телефон сўзлашувлари эшитилгани аён бўлгач, Берлин ва Вашингтон муносабатлари анча ёмонлашган.

Бундан олдин АҚШ раҳбари Барак Обама жосуслик амаллари ҳақида хабари бўлмаганини айтиб, буни бошқа қайтарилмалигини билдирганди.

Бироқ Олмония расмийларига кўра, Вашингтон билан жосуслик қилмаслик борасидаги икки томонлама келишув уринишлари натижасиз қолмоқда.