Славянскда Украина тикучари уриб туширилган, қурбонлар бор
Сурат манбаси, sergey esipov
Россияпараст бўлгинчилар Украина армиясининг ҳарбий тикучарини уриб туширганлар.
Муваққат президент Олександр Турчиновга кўра, бир генерал дохил, 14 киши ҳалок бўлган.
Олий Радада чиқиш қилган жаноб Турчиновга кўра, бўлгинчилар Россияда ишлаб чиқарилган учоқларга қарши ишлатиладиган қуролдан фойдаланишган.
Гувоҳларнинг сўзларига қараганда, Краснолиманск қайрилишида, Андреевка, Красний Молочник посёлкасида шиддатли жанглар кетмоқда.
Отишма овозлари эшитилмоқда, осмонга қора тутунлар ўрламоқда, деган улар.
Бир кун олдин ҳам бўлгинчилар икки тикучарни нишонга олганларини айтганлар, расман бу маълумот тасдиқланмаган эди.
Украина президентлик сайлови ғолиби Петро Порошенко Украина шарқида бўлгинчиларга қарши ҳарбий амалиётлар давом эттирилиши ва қисқа муддатда якунлашини айтган.
Сурат манбаси, Reuters
Қўлга тушган кузатувчилар
Славянск "халқ ҳокими" Вячеслав Пономарёвнинг тасдиқлашича, унинг одамлари ЕҲҲТ нинг кузатувчиларини ушлаганлар.
Пономарёвга кўра, қандайдир асбоби билан бўлгинчиларда гумон уйғотган кузатувчилар жосусликка алоқалари бор-йўқлиги текширилмоқда.
"Биз ЕҲҲТни бундан олдин ҳам Донецк тупроғига қадам босмасликни айтиб, огоҳлантирганмиз. Улар барибир қулоқ солишмади. Шунинг учун ушладик. Уларни текширяпмиз. Шубҳалар исботланмаса, уларни қўйворамиз албатта", деган бўлгинчилар раҳбари.
У Макеевкада ушлаб турилган кузатувчиларнинг аҳволи яхшилигини қайд этиб ўтган.
Сурат манбаси, Arkadiy Babchenko
Ҳарбий бўлинмага ҳужум
Айни пайтда Луганскда қуролланган айирмачилар Миллий гвардиянинг ҳарбий бўлинмасига ҳужум қилганлар.
Россияпарастлар бинонинг бир қисми ва қўриқчилар гуруҳининг қуролларини эгаллаб олишган.
Ҳужум вақтида аскарлар қуроллиларга қарши туришган, бироқ отишма овозларидан хавотир олиб келган аскарларнинг яқинлари ва журналистларни бўлгинчилар "тирик қалқон" сифатида олдинга қўйганлар. Бундан ташқари бўлгинчилар аскарларнинг ота-оналарини биринчи қаватга қамаб, бинони портлатиш билан таҳдид қилган.
Шундан сўнг 100 га яқин аскарлар қуролларини топшириб, бўлинмани тарк этганлар.
Тўқнашувларда бир аскар ҳалок бўлган, бир неча киши яраланган. Бўлгинчилар беш кишисини йўқотган.
Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002
Агар матнда имло хатоси бўлса, бизга билдиринг.
