АҚШ: Жазосиз полициячига қарши намойишлар бошқа шаҳарларга ёйилди
Сурат манбаси, AFP
АҚШнинг кўп шаҳарларида 18 ёшли қора танли ўсмир Майкл Браунни отиб ўлдирган полициячини маҳкамага тортмаслик қарори ортидан ўн минглаб америкаликлар норозилик намойишларига чиққанлар.
Ню-Йоркдан тортиб Сиэтлгача бўлиб ўтган намойишлар асосан тинч ўтган.
Аввалроқ Миссури штати маъмурияти ўсмир отиб ўлдирилган Фергюсон шаҳридаги тартибсизликларни аритиш учун қўшимча кучларни йўллаган.
Камида уч киши - бир аёл ва икки эркак ҳибсга олинганлар. Сент-Луис округи полицияси тошлар билан ҳужум қилган намойишчиларга қарши кўзни ёшлантирувчи газни қўллаганини хабар қилди.
Сурат манбаси, Reuters
Намойишлар тўлқинига ўсмир Майкл Браунни отиб ўлдирган полициячининг маҳкама маслаҳатчилар ҳайъати томонидан оқлангани сабаб бўлган.
Би-би-сининг Фергюсондаги мухбирига кўра, шаҳардаги аҳвол танглигича қолмоқда ва қоронғу тушиши биланоқ полиция бўлими қаршисида тобора кўп одамлар йиғилмоқда.
Кеча Фергюсонда ўнлаб уйлар ёқиб юборилган, 29 одам қўлга олинган, бир полициячи эса ўқдан яраланган.
Маҳкама маслаҳатчилар ҳайъати томонидан оқланган 28 ёшли полициячи Даррен Уилсоннинг адвокати қарорни ҳуш қарши олган ва полициячилар кўп ҳолларда бир сония ичида мушкул қарор қабул қилишлари керак бўлишини айтган.
Сурат манбаси, Reuters
Уилсоннинг ўзи эса Эй-Би-Си каналига берган интервюсида виждони қийналмаётганини айтган.
Марҳум Майкл Браун оиласининг адвокати эса маҳкама қарорини "адолатсиз" дея қоралаган.
"Биз қўлимиздан келганини қилдик ва бу жараён қанчалар адолатсиз бўлганига гувоҳ бўлдик. Ҳатто юридик факультетнинг биринчи курс талабаси ҳам Уилсонни яхшироқ сўроқ қилган бўларди", - деди адвокат Бенжамин Крамп.
