Францияда ҳужум: ‘Бир инсоннинг боши танасидан жудо қилинган’
Сурат манбаси, BBC World Service
Хабарларга кўра, ҳужум Лион шаҳри яқинидаги газни суюлтирувчи корхонада амалга оширилган.
Исломчиларнинг иши, деб гумон қилинаётган ҳужумда бир эркакнинг боши танасидан жудо қилинган, камида бир киши яраланган.
Хабарларга кўра, бир қанча кичик портлашлар ҳам юз берган.
Сен-Кантен-Фаллавье шаҳрида жойлашган корхонадаги манба бунга газ тўла канистерлар сабаб бўлган бўлиши мумкинлигини айтмоқда.
Франциялик мулозимларга кўра, махсус полиция кучлари ҳужум билан алоқадорликда бир шахсни қўлга ҳам олишган.
Аммо, хабарларда айтилишича, ҳужумчилар икки нафар бўлишган.
Арабча ёзувлар битилган байроқ ўрнатилган машинада корхонага бостириб киришган.
Air Products корхонаси Америкага тегишли бўлгани айтилмоқда.
Франция оммавий-ахборот воситаларининг хабар беришича, бошидан жудо қилинган тана ёнида исломий байроқ ҳам топилган.
Сўнгги хабарлардан қурбоннинг корхона ходими экани англашилади.
Франциялик масъулларга кўра, амалга оширилган ҳужум юзасидан аллақачон тергов ишлари бошланган.
Масъуллар ишнинг корхонага ҳужум қилган "бир гуруҳ" шахсларга қарши олиб борилаётганини айтишмоқда.
Ҳужум ортидан, Оврўпо Иттифоқининг йиғинида бўлган президент Франсуа Олланд ҳам кечга қолмай Брюсселдан Францияга қайтмоқчи.
Аммо у йўлга чиқишдан олдин махсус матбуот анжумани берган.
Лион яқинидаги ҳужумда бир киши қурбон бўлиб, икки нафарининг яраланганини тасдиқлаган.
Қўлга олинган гумондорнинг шахси аниқлангани, ҳозир унинг бошқа ҳамкорлари бўлганми-йўқлиги ўрганилаётганини ҳам билдирган.
Жаноб Олланд ҳужумчилар икки нафар бўлишганини айтаркан, иккинчи шахснинг ким экани тафсилотларини очиқламаган.
Аммо, Франция президентига кўра, бу - террорчилик амали бўлган.
Ҳужумчилар эса, корхонани портлатиш мақсадида бўлишган.
Сурат манбаси, BBC World Service
Тез орада Франция Ички ишлар вазирининг ҳужум сатҳига етиб бориши кутилмоқда.
Лион шаҳри яқинидаги ҳужум эса, маҳаллий вақт билан эрталабки 10:00 да амалга оширилган.
Маҳаллий “Le Dauphine Libere” нашрининг ёзишича, шу ой бошида машинада бўлган бир шахснинг корхона атрофида “ўралашиб” юргани кузатилган.
Аммо Франция телевизион каналларидан бирининг хабар беришича, ҳибсга олинган шахснинг ёнида кимлигини тасдиқловчи бирор бир ҳужжат бўлмаган.
Ўзи эса, аксилтеррор полиция кучлари вакилларига гапиришдан бош тортган.
“Франс-Пресс” ахборот агентлигига кўра, қурбоннинг бошидан шоша-пиша битилган арабча ёзув ҳам топилган.
Франция Бош вазири Мануэль Вальс Лион атрофидаги барча қалтис сатҳларда хавфсизлик чораларини кучайтиришга буйруқ берган.
Бордо ҳокими эса, ўзининг “Твиттер” аккаунтида юз берган ҳужумни қоралаб чиққан.
“Террорчилик таҳдиди юқори экани, Франция фуқароларини ҳимоя қилиш учун қўлидан келган барча чораларни ишга солиши лозимлиги”ни айтган.
Сўнгги ҳужум исломий жангариларнинг Париж атрофида уюштирган ва 17 инсоннинг умрига зомин бўлган ҳужумларидан олти ойча ўтиб кузатилмоқда.
Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.
Instagram – BBC UZBEK
Twitter – BBC UZBEK
Odnoklassniki – BBC UZBEK
Facebook- BBC UZBEK
Google+ BBC UZBEK
YouTube - BBCUZBEK (https://www.youtube.com/user/bbcuzbek)
Skype - bbcuzbekradio
