Юнон бош вазири: "Оврўпо бўлиниб кетишига йўл қўймайлик!"

Published 8 июл 2015

Қарзларга ботган Юнонистоннинг евро ҳудудида қолиши борасида шубҳалар кучайиб борар экан, юнон бош вазири Алексис Ципрас Оврўпо Иттифоқи бўлиниб кетишининг бартараф этилишига чақирди.

Оврўпо парламентида ўтган эҳтиросларга тўла дебатда у: "Оврўпо бўлиниб кетишига йўл қўймайлик!" - деди.

Якшанба кунига мўлжалланган Оврўпо Иттифоқининг саммити бошланишидан аввал Юнонистон ўзининг янги таклифларини кредиторларга пайшанбагача топшириши керак.

Жаноб Ципрас бу таклифлар устида иш олиб борилаётганини айтди, аммо тафсилотларини бермади.

Юнон бош вазири "Юнонистон ва евроҳудуд манфаатлари учун" ўз мамлакати келгуси бир неча кун ичида ўзига қўйилган мажбуриятларни бажаришига ишонишини айтди.

У парламентга кириб келар экан, баъзилар уни қоралаб қичқирса, бошқалар қарсак чалишди.

Ўз нутқида Ципрас жаноблари собиқ қутқарув ёрдамларини қоралади ва улар Юнонистонни "бюджет харажатларини кесиш лабораторияси"га айлантириб қўйганини айтди.

"Бу тажриба муваффақиятли бўлмаганини барчамиз тан олишимиз керак", - деди у Страсбургдаги парламентда чиқиш қила туриб.

Skip Энг кўп ўқилган and continue reading

Энг кўп ўқилган