Llaeth: Dau weinidog i drafod â ffermwyr

Bydd dau o weinidogion llywodraeth Prydain yn cwrdd â ffermwyr ddydd Llun ar faes y Sioe Fawr yn Llanelwedd ym Mhowys.

Bydd y Gweinidog Amaeth, Jim Paice a'r Ysgrifennydd Amgylchedd Caroline Spelman yn trafod eu cwynion am brisiau llaeth.

Mae'r Llywodraeth hefyd yn trefnu i gwrdd â chynrychiolwyr o'r archfarchnadoedd mawr dros y dyddiau nesaf.

Mae ffermwyr llaeth wedi cynnal protestiadau y tu allan i ganolfannau prosesu llaeth yr wythnos hon i dynnu sylw at y pris maen nhw'n ei gael am eu cynnyrch.

Ddydd Sadwrn cyhoeddodd archfarchnad Morrisons eu bod yn cynyddu'r taliadau i ffermwyr 2c-y-litr i 6c-y-litr.

Mae Dirprwy Weinidog Amaeth Cymru wedi rhybuddio ffermwyr i beidio â gwastraffu llaeth fel protest yn erbyn prisiau.

Cafodd y syniad ei grybwyll mewn cyfarfod yn Llandeilo nos Iau wrth i gannoedd o ffermwyr eraill wrthdystio yn Lloegr.

Mae 'na gwyno am archfarchnadoedd ond y nhw sy'n talu orau, yn ôl Consortiwm Manwerthu Prydain.

Roedd dros 200 o ffermwyr yn bresennol yn y cyfarfod gan wrando ar Alun Davies yn y cyfarfod oedd yn cael ei gadeirio gan aelodau etholedig Plaid Cymru yn Nwyrain Caerfyrddin a Dinefwr, Rhodri Glyn Thomas a Jonathan Edwards.

Fe addawodd y tri gwleidydd wrando ar bryderon y ffermwyr.

Ac fe ddywedodd y gweinidog y byddai Llywodraeth Cymru yn ceisio gwneud popeth bosib i helpu'r diwydiant llaeth.

Ychwanegodd na fyddai'r ffermwyr yn cael cefnogaeth y cyhoedd petai llaeth yn cael ei wastraffu mewn protest.