Corff Casnewydd: Heddlu'n cadarnhau mai Nida yw hi

Mae Heddlu Gwent wedi cadarnhau mai corff Nida Naseer gafodd ei ddarganfod mewn gwlyptiroedd yng Nghasnewydd ddydd Iau.

Doedd Nida Naseer, 19, heb ei gweld ers iddi fynd a sbwriel allan o'i thy ar Stryd Linton, Pill ar Ragfyr 28.

Cafodd y corff ei ddarganfod am tua 10.00yb ar Wlyptiroedd Gwent ger West Nash Road.

Mae'r farwolaeth yn dal i gael ei drin fel un anesbonadwy, ac mae disgwyl canlyniadau archwiliad post-mortem.

Mae teulu Nida Naseer yn parhau i gael cymorth gan yr swyddogion arbenigol yr heddlu.

Dywedodd yr Uwcharolygydd Mark Warrender: "Mae hwn yn achos trasig iawn ac mae'n cydymdeimlad gyda'i theulu.

"Ers i Nida fynd ar goll, rydym wedi parhau'n obeithiol y byddai'n cael ei darganfod yn saff ac yn iach ac y gallai ailymuno â'i theulu.

"Roedd darganfyddiad ddoe yn ddatblygiad trist iawn i mi a'r tîm ymchwiliadol sydd wedi bod yn benderfynol o ddod o hyd i Nida ers y noson y diflanodd.

"Fe fyddwn yn parhau i gefnogi'r teulu yn ystod yr amser ofnadwy yma, ac, ar eu rhan, hoffwn ofyn i chi adael llonydd iddyn nhw nawr i alaru."