Amgueddfa dros dro i glwb pêl droed Wrecsam

Mae amgueddfa dros dro sydd yn dathlu hanes Clwb Pêl Droed Wrecsam ar ei ben-blwydd yn 150, wedi agor mewn siop wag yn y dref.

Sefydlwyd Clwb Pêl Droed Wrecsam yn 1864 felly dyma'r hynaf yng Nghymru a'r trydydd hynaf yn y byd.

Y Cae Ras yw'r cae pêl-droed rhyngwladol hynaf yn y byd sydd ddal mewn defnydd.

Roedd y cyn-chwaraewr Mickey Thomas yn westai arbennig wrth i'r amgueddfa agor. Chwaraeodd Mr Thomas ran allweddol yng ngêm fuddugol Wrecsam yn erbyn Arsenal yn 1992.

Mae'r amgueddfa yn cynnwys ffilm o Gymru'n chwarae yn erbyn Iwerddon yn 1906 a cafodd ei wneud gan gwmni Mitchell a Kenyon o Sir Gaerhirfryn.

Dyma, yn ôl y son, oedd y gêm bêl droed rhyngwladol gyntaf i gael ei chofnodi ar ffilm.

Mae'r amgueddfa yn cynnwys eitemau sydd wedi eu rhoi gan aelodau o'r cyhoedd wedi apêl yn gynharach yn y flwyddyn. Mae'r rhain yn cynnwys hen bapurau newydd, rhaglenni a thocynnau.

Mae'r amgueddfa ar agor o 11am i 4pm yng nghanolfan siopa Dôl yr Eryrod tan ddydd Sadwrn 31 Mai.