Marwolaeth beicwraig yn Sir y Fflint: Dau yn y llys

Mae dyn wedi ymddangos yn y llys, wedi ei gyhuddo o achosi marwolaeth dynes yn Sir y Fflint y llynedd drwy yrru'n beryglus.

Fe fuodd Carol Olive Boardman, oedd yn fam i'r cyn bencampwr seiclo Olympaidd Chris Boardman, farw ar 16 Gorffennaf y llynedd.

Roedd hi ar ei beic pan fu mewn gwrthdrawiad â fan yng Nghei Connah.

Mae Liam Rosney, 31 oed, wedi ei gyhuddo o achosi marwolaeth trwy yrru'n beryglus ac o geisio gwyrdroi cwrs cyfiawnder.

Mae Victoria Rosney, 31 oed, hefyd wedi ei chyhuddo o geisio gwyrdroi cwrs cyfiawnder.

Fe gafodd y ddau, sydd yn dod o Gei Connah, orchymun i ymddangos o flaen Llys Y Goron Yr Wyddgrug ar 27 Hydref.