Llys yn gorchymyn Tomlin i weithio 80 awr yn y gymuned

Mae barnwr wedi gorchymyn chwaraewr canol cae Caerdydd, Lee Tomlin i gwblhau 80 awr o waith yn y gymuned yn dilyn ei ran mewn ymosodiad ar ddyn arall.

Fe wnaeth Tomlin, 28 oed gyfaddef i gyhuddiad o achosi ffrae wnaeth arwain at anafiadau difrifol i ddyn arall y tu allan i glwb nos yng Nghaerlŷr ar 22 Ionawr.

Fe benderfynodd erlynwyr yn Llys y Goron Caerlŷr i beidio â pharhau gyda chyhuddiad o glwyfo ar ôl edrych ar dystiolaeth CCTV a oedd yn dangos y dioddefwr yn ei herio.

Roedd Tomlin yn chwarae i glwb Bristol City ar y pryd, ac fe wrthododd Caerdydd wneud unrhyw sylw ar y mater pan gafodd ei gyhuddo o'r drosedd.

Roedd Tomlin a chwaraewr Accrington Stanley, Billy Kee yn cael eu cyhuddo o achosi niwed corfforol difrifol ond fe orchmynnodd y barnwr i'r cyhuddiad hwnnw gael ei ollwng yn erbyn y ddau.