A dyna ddiwedd ar y Cyfarfod Llawn am heddiw.

Bydd Senedd Fyw yn ôl fory i ddod â'r diweddaraf o'r Pwyllgor Plant, Pobl Ifanc ac Addysg.

Dyna gwblhau Cyfnod 3 o Fesur Angenion Dysgu Ychwanegol a'r Tribiwnlys Addysg (Cymru)

Yn gyffredinol, mae pedwar cyfnod yn y broses ar gyfer ystyried Mesur Cyhoeddus, sef:

• Cyfnod 1 - pwyllgor yn ystyried egwyddorion cyffredinol y Mesur a'r Cynulliad yn cytuno ar yr egwyddorion cyffredinol hynny;

• Cyfnod 2 - pwyllgor yn ystyried y Mesur ac unrhyw welliannau a gyflwynwyd i’r Mesur hwnnw yn fanwl;

• Cyfnod 3 - y Cynulliad yn ystyried y Mesur ac unrhyw welliannau a gyflwynwyd i’r Mesur hwnnw yn fanwl;

• Cyfnod 4 - pleidlais gan y Cynulliad i basio testun terfynol y Mesur.

Wrth gyflwyno'r grŵp olaf o welliannau, diolchodd Kirsty Williams i Darren Millar o'r Ceidwadwyr a Llyr Gruffydd o Blaid Cymru am eu cyfraniadau.

Ni chafwyd cyfraniad gan UKIP yn ystod y ddadl.

Dydy'r gwelliant gan Llyr Gruffydd, ac sy'n cael ei gefnogi gan Darren Millar ar ddarpariaeth addysg Gymraeg ddim yn cael cefnogaeth y llywodraeth.

Mae Kirsty Williams yn dadlau na fyddai'r gwelliant yn cryfhau'r mesur, gan fod gofyniad cyfreithiol ar awdurdodau lleol a chyrff llywodraethol i ystyried anghenion siaradwyr Cymraeg sydd ag anghenion dysgu ychwanegol.

Chafodd y gwelliant ddim ei basio.

Ffynhonnell y llun, Thinkstock

Mae gwellianau nesaf yn ymwneud ag Asesu Darpariaeth Gymraeg. Llyr Gruffydd sy'n eu cyflwyno.

Maen nhw'n nodi'r angen i "bob awdurdod lleol a bwrdd iechyd lleol yn unol â rheoliadau, asesu -

(a) y graddau y mae plant a phobl ifanc yn ei ardal a fyddai’n debygol o wneud cais am ddarpariaeth ddysgu ychwanegol drwy gyfrwng y Gymraeg;

(b) a oes ganddo’r capasiti i ddarparu darpariaeth ddysgu ychwanegol drwy gyfrwng y Gymraeg ar gyfer y plant a’r bobl ifanc hynny a nodir yn unol â pharagraff (a);

(c) y camau y mae’n ofynnol eu cymryd i ddarparu ystod a lefel y gwasanaethau a nodwyd yn unol â pharagraff (a) drwy gyfrwng y Gymraeg.

Caiff rheoliadau o dan is-adran (1), er enghraifft, ddarparu ar gyfer—

(a) amseru ac adolygu asesiadau;

(b) trefniadau ar gyfer cydweithio.

(3) Rhaid i bob awdurdod lleol a bwrdd iechyd lleol sicrhau bod ganddo’r capasiti, erbyn dyddiad a gytunir rhyngddo a Gweinidogion Cymru, i gyflawni darpariaeth ddysgu ychwanegol drwy gyfrwng y Gymraeg ym mhob achos y gwneir cais am hynny.

Cafodd gwelliant 62 yn ymwneud â "Chadw’n gaeth o dan Ran 3 o Ddeddf Iechyd Meddwl 1983" ei basio.

Gallwch weld rhestr o'r gwelliannau yma, dolen allanol.

Bydd y Mesur yn creu un cynllun statudol, dolen allanol (y cynllun datblygu unigol (CDU)) i gymryd lle’r amrywiaeth o gynlluniau AAA ac AAD statudol ac anstatudol cyfredol sydd ar gael i ddysgwyr mewn ysgolion ac addysg bellach.

Y nod yw sicrhau mwy o gysondeb a pharhad a sicrhau bod darpariaeth a hawliau'n cael eu diogelu, pa mor ddifrifol neu gymhleth bynnag yw'r anghenion.

Mae tri gwelliant gan Llyr Gruffydd ar baratoi a chynnal CDUau yn cael eu cefnogi gan y llywodraeth.

Fe gafodd nifer o welliannau gan y Llywodraeth oedd yn ymwneud â geiriad y fersiwn Gymraeg yn unig eu pasio, gan gynnwys newid ‘dyledus’ i ‘dyladwy’ ac ‘oddigerth’ i ‘ac eithrio’.

Mae modd gweld y rhestr o welliannau wedi eu didoli, dolen allanol ar y mesur.

Cafodd pob un o welliannau'r llywodraeth ar ddyletswydd i roi sylw i Gonfensiwn y Cenhedloedd Unedig ar Hawliau’r Plentyn eu pasio.

Mae'r grŵp cyntaf o welliannau, sy'n cael eu cynnig gan Darren Millar, am cyngor a gwybodaeth. Mae Llyr Gruffydd yn cefnogi'r rhan fwyaf ohonyn nhw.

Eglurodd yr Ysgrifennydd Addysg eu bod "unai'n amhriodol neu'n ddiangen oherwydd darpariaeth sydd eisoes yn y mesur neu oherwydd bod y llywodraeth wedi cynnig gwelliant arall ar yr un mater."

Gwrthodwyd y gwelliant cyntaf gan Darren Millar oedd yn nodi "rhaid i’r cod ac unrhyw ddiwygiadau iddo fod ar gael i blant a phobl ifanc".

Mae'r Ysgrifennydd Addysg Kirsty Williams yn diolch i'r pwyllgor am eu gwaith craffu ar y mesur hyd yma.

"Rydyn ni mewn sefyllfa gref," medd Kirsty Williams, "ac rwy'n edrych ymlaen i barhau â'r gwaith er mwyn cyflwyno system well i'n dysgwyr mwyaf bregus, fel bod ganddyn nhw gefnogaeth i gyrraedd eu gwir botensial."

Cafodd y mesur ei lansio gan y cyn weinidog Dysgu Gydol Oes, Alun Davies ym mis Rhagfyr 2016, gyda'r nod o sicrhau y byddai mwy o bobl ifanc ag anghenion dysgu ychwanegol yn cael canlyniadau academaidd gwell.

Ym mis Hydref 2017, daeth y mesur dan y chwyddwydr, pan ddaeth i'r amlwg fod cost llunio'r mesur wedi cynyddu.

Dywedodd pwyllgor cyllid y Cynulliad fod angen gwella'r ffordd y mae Llywodraeth Cymru'n mesur beth maen nhw'n ei feddwl fydd cost deddfau newydd.

Mae ACau'n trafod Cyfnod 3 y Mesur Anghenion Dysgu Ychwanegol a'r Tribiwnlys Addysg (Cymru), sydd â'r nod o ddarparu ar gyfer fframwaith statudol newydd er mwyn cefnogi plant a phobl ifanc sydd ag anghenion dysgu ychwanegol.

ACau yn cymeradwyo bod y fersiwn ddrafft o’r Gorchymyn Ystadegau Swyddogol (Cymru) 2017 yn cael ei lunio yn unol â’r fersiwn ddrafft a osodwyd, dolen allanol.

Diolchodd Vaughan Gething am drafodaeth adeiladol ac ystyriol ar gamddefnydd sylweddau, gan nodi fod hon yn broblem gymhleth nad oes ateb hawdd iddi.

"Yn ystod fy nghyfnod i'n gweithio yn y carchar fe welais lawer o fywydau wedi eu difetha o ganlyniad i'r hyn roedden nhw wedi ei gymryd" meddai Caroline Jones o UKIP.

Mae'r cynnydd yn nifer y marwolaethau sy'n gysylltiedig â chyffuriau yng Nghymru yn achos pryder mawr, medd Leanne Wood.

Mae'n galw am ddatganoli grymoedd o fewn y System Cyfiawnder Troseddol.

Mae Mark Isherwood yn cyflwyno gwelliannau ar ran y Ceidwadwyr, yn gresynu:

a) bod adroddiad blynyddol 2017 ar strategaeth camddefnyddio sylweddau 10 mlynedd Llywodraeth Cymru, 'Gweithio Gyda’n Gilydd i Leihau Niwed' yn dangos y bu cynnydd yn nifer y marwolaethau sy'n gysylltiedig ag alcohol ac sy'n gysylltiedig â chyffuriau yng Nghymru;

b) bod nifer y bobl sy'n cwblhau triniaeth yn rhydd o sylweddau wedi gostwng; ac

c) bod llai o bobl yn dechrau triniaeth o fewn 20 diwrnod i'r dyddiad y cânt eu cyfeirio na dwy flynedd yn ôl.

Mae'n galw ar Lywodraeth Cymru i "gynyddu capasiti gwasanaethau dadwenwyno haen 4 i gleifion mewnol a gwasanaethau adsefydlu preswyl, gan gydnabod nad yw hyn yn ddewis amgen i wasanaethau sy'n canolbwyntio ar adfer o fewn y gymuned."