લોકસભા ચૂંટણી 2019 : સાત રાજ્યોમાં પાંચમા તબક્કાનું મતદાન પૂર્ણ

લોકસભા ચૂંટણીના પાંચમા તબક્કામાં ચૂંટણી પંચના આંકડાઓ પ્રમાણે 62.32 ટકા મતદાન થયું છે.

જેમાં સૌથી વધારે પશ્ચિમ બંગાળમાં 74.15 ટકા મતદાન થયું છે. જ્યારે સૌથી ઓછું જમ્મુ-કાશ્મીરમાં 17.07 ટકા મતદાન થયું છે.

બિહારમાં 57.76 ટકા, ઝારખંડમાં 64.58 ટકા, મધ્ય પ્રદેશમાં 63.99 ટકા, રાજસ્થાનમાં 63.70 ટકા અને ઉત્તર પ્રદેશમાં 57 ટકા મતદાન થયું છે.

હેમંત સોરેન પર ભાજપનો આરોપ

પૂર્વ મુખ્ય મંત્રી અને ઝારખંડ મુક્તિ મોરચાના કાર્યકારી અધ્યક્ષ હેમંત સોરેન અને તેમનાં પત્ની કલ્પના સોરેન પર ભાજપે આચારસંહિતાના ઉલ્લંઘનનો આરોપ લગાવ્યો છે. તેઓ પોતાની પાર્ટીના ચિહ્નવાળો ખેસ નાખીને મત આપવા આવ્યાં હતાં.

ભારતીય ક્રિકેટ ટીમના પૂર્વ કૅપ્ટન મહેન્દ્ર સિંહ ધોનીએ પરિવાર સાથે રાંચીમાં મતદાન કર્યું હતું.

ભાજપનો બોગસ મતદાનનો આરોપ

ભાજપે પશ્ચિમ બંગાળની બૈરકપુર લોકસભા બેઠક પર બોગસ મતદાનનો આરોપ લગાવ્યો છે. ભાજપ નેતા અને કેન્દ્રીય મંત્રી પ્રકાશ જાવડેકરે પ્રેસ-કૉન્ફરન્સ કરીને કહ્યું કે આ બેઠક પરના ભાજપના ઉમેદવાર અર્જુન સિંહ સાથે તૃણમૂલ કૉંગ્રેસના ગુંડાઓએ ધક્કામુક્કી કરી હતી. તેમજ તેમણે બૈરકપુર મતક્ષેત્રમાં ફરી વાર મતદાનની માગ કરી હતી.

મતદાન માટે રાજનાથ સિંહ લાઇનમાં ઊભા રહ્યા હતા. લખનૌમાં રાજનાથ સિંહે કહ્યું કે ભાજપ માટે મહાગઠબંધન કોઈ પડકાર નથી. હું મહાગઠબંધનના ઉમેદવાર વિશે કંઈ નહીં કહું, કેમ કે મારા મતે ચૂંટણી વ્યક્તિઓ પર નહીં, મુદ્દાઓ પર લડાય છે.

આ સાત રાજ્યોમાં બિહાર, પશ્ચિમ બંગાળ, ઉત્તર પ્રદેશ, જમ્મુ અને કાશ્મીર, ઝારખંડ, રાજસ્થાન અને મધ્ય પ્રદેશનો સમાવેશ થાય છે.

પાંચમા તબક્કામાં કૉંગ્રેસ અધ્યક્ષ રાહુલ ગાંધી, યૂપીએ (યુનાઇટેડ પ્રોગ્રેસિવ અલાયન્સ)નાં અધ્યક્ષા સોનિયા ગાંધી, કેન્દ્રીય ગૃહ મંત્રી રાજનાથ સિંહ, સ્મૃતિ ઈરાની, રાજ્યવર્ધન સિંહ રાઠોડ, મહેબૂબા મુફ્તી સહિતના દિગ્ગજોનું રાજકીય ભાવિ ઈવીએમ (ઇલેક્ટ્રોનિક વોટિંગ મશીન)માં સીલ થઈ જશે.

51 બેઠક ઉપર કુલ 674 ઉમેદવાર ચૂંટણીજંગમાં છે. આ તબક્કાનું મતદાન પૂર્ણ થતાં લોકસભાની કુલ 425 બેઠક માટે મતદાન પૂર્ણ થઈ જશે.

પાંચમા તબક્કામાં કુલ આઠ કરોડ 75 લાખ (ચાર કરોડ 63 લાખ પુરુષ તથા ચાર કરોડ 12 લાખ મહિલા) નાગરિકો તેમના મતાધિકારનો ઉપયોગ કરશે.

Live અપડેટ્સ :

ક્યાં-ક્યાં મતદાન

બિહાર : સીતામઢી, મધુબની, મુજફ્ફરપુર, સારણ તથા હાજીપુર

જમ્મુ અને કાશ્મીર : અનંતનાગ તથા લદ્દાખ

ઝારખંડ : કોડરમા, રાંચી, ખૂંટી અને હઝારીબાગ

પશ્ચિમ બંગાળ : બનગાંવ, બરાકપુર, ઉલુબેડિયા, શ્રીરામપુર, હુગલી તથા આરામબાગ

ઉત્તર પ્રદેશ : અમેઠી, રાયબરેલી, બાંદા, લખનૌ, ધૌરહરા, ગોંડા, સીતાપુર, મોહનલાલગંજ, ફતેહપુર, બારાબંકી, ફૈઝાબાદ, બહરાઇચ તથા કૈસરગંજ

રાજસ્થાન : શ્રીગંગાનગર, બીકાનેર, ચુરુ, ઝુંઝુનુ, સિકર, જયપુર (ગ્રામીણ), જયપુર, અલવર, ભરતપુર, કરૌલી-ધૌલપુર, દૌસા તથા નાગૌર

મધ્ય પ્રદેશ : ટિકમગઢ, દમોહ, ખજૂરાહો, સતના, રીવા, હોશંગાબાદ, બૈતૂલ

આપને આ પણ વાચવું ગમશે

674 ઉમેદવાર ચૂંટણીજંગમાં

ઍસોસિયેશન ફૉર ડેમોક્રેટિક રિફૉર્મ્સે પાંચમા તબક્કામાં ચૂંટણીજંગમાં ઝંપલાવનારા 674માંથી 668 ઉમેદવારોની ઍફિડેવિટનું વિશ્લેષણ કર્યું હતું.

રાષ્ટ્રીય પક્ષોના 149, પ્રાદેશિક પક્ષોના 31, માન્ય ન હોય તેવા દળોનાં 236 તથા 252 અપક્ષ ઉમેદવારોએ ચૂંટણીજંગમાં ઝંપલાવ્યું છે.

પાંચમા તબક્કામાં કુલ 79 મહિલા ઉમેદવારોએ ચૂંટણીજંગમાં ઝંપલાવ્યું છે.

રિપોર્ટ મુજબ, 668 ઉમેદવારોમાંથી 19 ટકા ઉમેદવારો ઉપર કેસ ચાલી રહ્યા છે. 14 ટકા ઉમેદવારો ઉપર ગંભીર પ્રકારના કેસ ચાલી રહ્યા છે.

એડીઆરના રિપોર્ટ મુજબ, 28 ટકા ઉમેદવાર કરોડપતિ છે, જ્યારે પાંચમા તબક્કામાં ઉમેદવારોની સરેરાશ સંપત્તિ રૂ. 2.57 કરોડ છે.

પાંચમા તબક્કાની મુખ્ય વાતો

પૂનમ સિંહા સૌથી ધનવાન ઉમેદવાર

પાંચમા તબક્કામાં ધનિક ઉમેદવારોની યાદીમાં પૂનમ સિંહા ટોચ ઉપર છે. તેમની પાસે રૂ. 193 કરોડ કરતાં વધુની સંપત્તિ છે.

સિંહા લખનૌ બેઠક ઉપરથી સમાજવાદી પાર્ટીનાં ઉમેદવાર છે. તેમની સામે કેન્દ્રીય ગૃહ મંત્રી રાજનાથસિંહ છે.

સીતાપુરની બેઠક ઉપરથી પ્રગતિશીલ સમાજવાદી પાર્ટી (લોહિયા)ના ઉમેદવાર વિજય કુમાર મિશ્રા બીજા ક્રમે છે. તેમની પાસે રૂ. 177 કરોડથી વધુની સંપત્તિ છે.

યશવંત સિંહાના પુત્ર અને હઝારીબાગની (ઝારખંડ) બેઠક ઉપરથી ભાજપના ઉમેદવાર જયંત સિંહા ત્રીજા ક્રમે સૌથી ધનવાન ઉમેદવાર છે. તેમની પાસે રૂ. 77 કરોડથી વધુની સંપત્તિ છે.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો