પાકિસ્તાનના લાહોરમાં સૂફી દરગાહ પાસે બ્લાસ્ટમાં 10 લોકોનાં મૃત્યુ, 20 ઘાયલ

પાકિસ્તાનના લાહોરમાં આવેલી સૂફી દરગાહ પાસે થયેલા બ્લાસ્ટમાં 10 લોકોનાં મૃત્યુ થયા હોવાના સમાચાર છે.

લાહોરમાં આવેલી મોટી દરગાહ દાતા દરબાર નજીક આ બ્લાસ્ટ થયા હોવાનું જણાવાય છે.

આ બ્લાસ્ટમાં ઓછામાં ઓછા 10 લોકોનાં મૃત્યુ થયા છે અને 20 લોકો ઘાયલ થયા છે.

લાહોર પોલીસના ડીઆઈજી (ઓપરેશન) મોહમ્મદ અશફાકે કહ્યું કે આ બ્લાસ્ટમાં દરગાહની બહાર પોલીસના વાહનને નિશાન બનાવવામાં આવ્યું છે.

રેડિયો પાકિસ્તાનના કહેવા મુજબ પાકિસ્તાનના વડા પ્રધાન ઇમરાન ખાને આ હુમલાની નિંદા કરી છે.

પોલીસનું શું કહેવું છે?

પાકિસ્તાનના પંજાબ પ્રાંતના પોલીસ આઈજી આરિફ નવાઝે કહ્યું કે આ એક આત્મઘાતી હુમલો હતો જેમાં પોલીસને નિશાન બનાવવામાં આવી છે.

એમણે કહ્યું કે, હુમલાખોર જે દિશામાંથી આવ્યો ત્યાંથી વધારે નુકસાન પણ થઈ શકે એમ હતું. પોલીસની ગાડી જે અહીં તહેનાત હોય છે તેને જ ટાર્ગેટ કરવામાં આવી હતી. તમામ એજન્સીઓ તપાસમાં લાગેલી છે અને પુરાવાઓ એકઠાં કરવામાં આવી રહ્યાં છે.

પોલીસે હાલ સમગ્ર વિસ્તારને કોર્ડન કરી લીધો છે અને હજી સુધી કોઈ ઉગ્રવાદી સંગઠને આની જવાબદારી લીધી નથી.

દાતા દરબાર અને સૂફી સ્થળો પર હુમલાઓ

ઉલ્લેખની છે કે 2010માં પણ આવી જ રીતે સૂફી દરગાહને નિશાન બનાવવામાં આવી હતી જેમાં 42 લોકોનાં મૃત્યુ થયા હતા.

દાતા દરબાર દરગાહ શિયા અને સુન્ની અને અન્ય ધર્મોના લોકો માટે પણ જાણીતી છે અને ત્યાં દર વર્ષે લાખો શ્રદ્ધાળુઓ આવે છે.

દક્ષિણ એશિયાની સૌથી પ્રાચીન દરગાહોમાં આ દરગાહનો સમાવેશ થાય છે.

આ દરગાહ અબુલ હસન અલી હુજવીરી નામના સૂફી સંતની છે જેઓ આ 11મી સદીમાં આ સ્થળે જીવ્યાં હોવાનું માનવામાં આવે છે.

આ સ્થળ લાહોરનું સૌથી પ્રખ્યાત પવિત્ર સ્થળ ગણાય છે.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો