Rangers ta ɗauki Clement tsohon kociyan Monaco da Club Bruges

Rangers ta naɗa tsohon kociyan Monaco da Club Bruges, Philippe Clement a matsayin wanda zai ja ragamar kungiyar kan yarjejeniyar kaka uku da rabi.

Mai shekara 49, tsohon mai tsaron bayan tawagar Belgium ya maye gurbin Michael Beale, wanda aka kora a farkon watan nan.

Shi kanshi Clement an kore shi a watan Yuni a Monaco, bayan wata 18 yana horar da kungiyar da ta kare a mataki na shida a Ligue 1 a bara.

Cikin waɗanda suka nemi aikin horar da Rangers, mahukuntan ƙungiyar sun tattauna da Clement da kociyan Yokohama F Marinos, Kevin Muscat.

Shi dai Muscat tsohon wanda ya taka leda a Rangers ne mai tsaron baya, wanda yanzu yake aikin horar da tamaula.