Soyinka ya ce zai bar Amurka ranar da Trump ya karbi mulki

Shahararren marubucin nan na Nigeria Wole Soyinka ya ce zai bar Amurka a ranar da aka rantsar da Donald Trump a matsayin shugaban kasa.

A wani martani da ya mayar na sakonnin imel da aka aike masa, Soyinka ya ce a ranar 20 ga watan Janairu na shekarar 2017, "ku kalli ficewa ta daga Amurka".

Mujallar Newsweek da ke Amurka ta ce zai kasance a kasar har sai Trump ya sha rantsuwa.

Ta kara da cewa, "An ambato Soyinka yana cewa "me ya sa ba za a jira har sai Trump ya karbi ragamar mulki ba?

"Ina aikace-aikacena na yau da kullum, amma kuma ba zan kara yin wasu ayyukan ba. A halin yanzu dai mu tsaya a kan hakan."

A makon da ya gabata ne dai Mista Soyinka ya yi alkawarin cewa zai yaga takardar izinin zamansa a Amurka, wato Green card idan Mista Trump ya yi nasarar zabe.

Kalamansa dai sun bayyana ne a wata tattaunawar bidiyo da ya yi da dalibai wadda aka nada a Jami'ar Oxford da ke Biritaniya.

Wole Soyinka dai ya yi hakan ne a matsayin wani martani ga tsauraran matakan da Donald Trump yake so ya dauka kan shiga da fita Amurka.