Marouane Fellaini zai yi jinya
Asalin hoton, Getty Images
Marouane Fellaini ba zai buga wa Manchester United wasan Premier da za ta kara da Liverpool ba, sakamakon raunin da ya ji a lokacin da yake yi wa Belgium tamaula.
Tawagar kwallon kafa ta Belgium sai sauya Fellaini ta yi saura minti 16 a je hutu a karawar da ta doke Bosnia-Herzegovina a wasan shiga gasar cin kofin duniya da suka buga a ranar Asabar.
Tawagar Belgium za ta kara da Cyprus a wasan shiga kofin duniya a ranar Talata, yayin da United za ta ziyarci Anfield a ranar 14 ga watan Oktoba.
United za ta ziyarci Benfica a gasar cin kofin Zakarun Turai ta Champions League, sannan ta fafata da Huddersfield a gasar Premier a ranar 21 ga watan Oktoba.
Fellaini ya ci wa United kwallo hudu a kakar bana, ciki har da guda biyu da ya ci Crystal Palace a gasar Premier.
