Trubhailean do dhaoine ann am "fìor èiginn."

Thèid trubhail fhàgail ann an 90 àite air oir an rathaid air taobh siar na Gàidhealtachd airson 's gum faod daoine an cuid salachair a thiodhlaigeadh.

Tha Comhairle Coimhearsnachd Loch Bhraoin cuideachd a' cur soidhnichean an-àirde ag innse do dhaoine far a bheil taighean-beaga.

Thuirt cathraiche na comhairle coimhearsnachd, Topher Dawson, gun gabhadh na trubhailean a chleachdadh nuair a bhiodh daoine ann am "fìor èiginn."

Thuirt e gun robh iomadach neach-tadhail - air an robh fàilte ga chur - a' tighinn dhan sgìre gun càil a dh'fhios aca nach biodh tòrr thaighean-beaga ann.

Tha a' chomhairle choimhearnsachd an urra ri sgìre mhòr de dh'iar-thuath na Gàidhealtachd mu chuairt air Ulapuil agus Dhùn Dòmhnaill

Tha a' Ghàidhealtachd air a bhith gu math trang le luchd-turais bho thòisich riaghailtean an Lockdown a bith air an lagachadh.

Thuirt Mgr Dawson gum bu chòir taic a thoirt do dhaoine aig nach eil fios nach eil mòran thaighean-beaga san sgìre.

Bha "freagairt èiginneach" a dhìth san ùine ghoirid, thuirt e, agus le sin chaidh 90 trubhail òrdachadh.

Tha e an dòchas, ge-tà, gum feuch daoine ri taigh-beag a lorg an toiseach.

Thuirt Mgr Dawson: "Tha mu 100 àite ri oir an rathaid far an urrainn do charbad stad, ach cha robh ach 90 trubhail ri fhaotainn airson a cheannach."

Bidh stiùireadh ann cuideachd bhon bhuidhinn Sreapdaireachd na h-Alba mu a bhith a' campachadh.

Tha Mgr Dawson an dòchas gum bi barrachd thaighean-beaga poblach ri fhaotainn an ath-bhliadhna.

An t-seachdain a chaidh chuir Comhairle na Gàidhealtachd agus buidhnean coimhearsnachd ìmpidh air luchd-tadhail gun càil fhàgail air an cùlaibh ach lorgan coise.

Tha seo an dèidh do thrioblaidean a bhith ann sna beagan sheachdainnean mu dheireadh far an robh luchd-campachaidh a' fàgail sgudail agus salachair às an dèidh.

An t-seachdain a chaidh chuir Comhairle nan Eilean Siar ìmpidh air luchd-tadhail a bha a' siubhail dha na h-eileanan ann am bhanaichean-campachaidh beachdachadh ro làimh air càite am biodh iad a' cur feum air taighean-beaga leis gun robh goireasan fhathast dùinte ri linn a' Choròna-bhìorais.