Binn gus a dhol air Hashem Abedi

Thèid binn a chur air bràthair bhomair Mhanchester Diardaoin airson 22 duine a mhurt.

Bha Eilidh NicLeòid, 14, à Barraigh nam measg.

Dh'obraich Hashem Abedi, 23, còmhla ri a bhràthair Salman, gus stuthan fhaighinn airson am boma a dhèanamh.

Dhiùlt e a chealla fhàgail Diciadain, 's an Old Bailey ann an Lunnainn a' cluinntinn fianais bho theaghlaichean a chaill càirdean.

Thuirt am britheamh Mgr Jeremy Baker nach robh cumhachd aige toirt air Abedi a bhith an làthair sa chùirt.

Chaidh brath sgrìobhte bho phàratan Eilidh NicLeòid a leughadh is iad ag ràdh nach eil là a' dol seachad gun bhròn agus strì.

Chaidh na ceudan de dhaoine a leòn nuair spreadhadh Salman e fhèin aig consairt Ariana Grande aig Arena Mhanchester sa Chèitean 2017.