Toileachas gum fosgail goireasan spòrs tràth

Thuirt a' bhuidhean Highlife na Gàidhealtachd gu bheil iad toilichte a bhith a' fosgladh ghoireasan spòrs dà sheachdain nas tràithe na bha dùil.

Cheadaich Riaghaltas na h-Alba gum fosgail amaran-snàimh agus diomaichean a-rithist bhon là mu dheireadh den Lùnastal.

Bidh feum aig luchd-obrach air trèanadh a bharrachd, agus bidh casg air na dh'fhaodas de dhaoine a bhith am broinn thogalaichean, 's bheirear cuid de dh'uidheamachd ann an diomaichean air falbh gus rùm a bharrachd a chruthachadh airson astar a chumail eadar daoine.

Na h-Eileanan an Iar

Aig a' cheart àm, tha Comhairle nan Eilean Siar ag ràdh gu bheil dùbhlain shònraichte mun coinneimh-san a thaobh a bhith a' fosgladh ghoireasan spòrs às ùr, leis gu bheil còig de na sia ionadan a tha an t-ùghdarras a' ruith stèidhichte ann an sgoiltean.

Thuirt a' Chomhairle gur e am prìomhachas aca daoine òga a thilleadh dha na sgoiltean, 's am fogham a thoirt air ais dhan àbhaist cho luath 's a ghabhas.

An Dàmhair

Ri linn sin, bidh cothrom nas lugha ann air na goireasan spòrs tro uairean sgoile suas gu làithean-saora an Dàmhair.

Nìthear ath-sgrùdadh air sin gach trì seachdainean.

A-rithist, bidh casg air na dh'fhaodas de dhaoine a dhol ann ri linn astarachaidh shòisealta.