Iomairt ùr an aghaidh seann nàmhaid

Bidh iomairt ùr aig sgioba Alba an aghaidh seann nàmhaid Iosrael ann an Lìog nan Dùthchannan oidhche haoine.

Chan eil sgioba nàiseanta na h-Alba air cluich gu farpaiseach bhon 19mh latha dhen t-Samhain.

Chuir sgioba Steve Clarke crìoch air iomairt dearbhaidh airson farpais Euro 2020 le 3 puingean an aghaidh Kazakhstan, ach às dèidh iomairt anns nach do thog na h-Albannaich ach 15 puing bho 30, le làn fhios aca nach robh cothrom aca fhaighinn dhan fharpais tron dòigh àbhaisteach.

Cha chanadh fiùs an neach-taic as dubhaiche aig an sgioba gun cailleadh Alba an cothrom faighinn dhan dearbh fharpais tron doras-cùl anns a Mhàrt ge ta.

Mar dhuais airson mar a bhuannaich Alba am buidhean aca anns a chiad thaisbeanadh de Lìog nan Dùthchannan ann an 2018, bha Alba gu cluich an aghaidh Iosrael ann an geama 'play-off' ann an nàdar de dhàrna cothrom faighinn fhan fharpais - farpais a bha gu bhi air a chluich air feadh na Roinn Eòrpa.

Coltach ri iomadh rud eile, chuir COVID-19 stad air an seo.

Gheibh Alba agus Iosrael cothrom tachairt air a phàirc airson tighinn nas fhaisge air na Euros an ath mhios, ach a-nochd bi aca ri cach a chèile a chluich aig Pàirce Hampden anns an dàrna taisbeanadh de Lìog nan Dùthchannan, leis na sgiobaidhean a-nis a cluich ann am buidhean còmhla ri Slovakia agus Poblachd ns Seic airson nàdar de phoileasaidh àrachais a bhi cluich air an àrd-ùrlar as motha anns an spòrs - Cupa na Cruinne ann an Qatar ann an 2022.

Bì na sgiobaidhean air fàs gu math eòlach air a chèile nuair a bhios dà gheama ann an Lìog nan Dùthchannan agus aon gheama dearbhaidh airson Euro 2020 seachad, ach the grunn atharrachaidhean air tighinn dhan dà sgioba bhon a thachair iad ann an 2018.

Tha an dà sgioba co-ionnan ann an aon dòigh, agus iad le chèile air an stiùireadh le manaidsearan a bhios a tòiseachadh iomairtean eadar-nàiseanta airson a chiad uair.

Cha robh Steve Clarke os cionn sgioba na h-Alba airson toiseach iomairt na h-Alba faighinn dha na Euros, ach Ailig MacIliosa.

Chaill na h-Albannaich 3-0 an aghaidh Kazakhstan anns a Mhàrt ann an 2019, agus cha do rinn 3 puingean ann an San Marino gu leòr airson teagmhan mun mhanaidsear a chuir gu aon taobh, le Clarke a gabhail an sgioba nàiseanta os laimh anns a Cheitean.

Thàinig Iosrael fo stiùir mhanaidsear ùr as t-samhradh, le Willibald Ruttensteiner a-nis os cionn an sgioba as dèidh a chò-Ostaireach, Andi Herzog, a dhreuchd fhàgail.

Le Iosrael air tuiteam co ìosal ri 93 air liosta rangachaidh aig FIFA, bi cuideam air Ruttensteiner togail a thoirt dhan sgioba.

Bì aig na manaidsearan ri atharrachaidhean a thoirt dha na sgiobaidhean aca air a' phàirce fhèin bhon a bhuannaich Alba 3-2 an aghaidh Iosrael aig Pàirce Hampden ann an 2018.

Ged a tha triùir aig Iosrael a tha cluich ann an Alba (Ofir Marciano aig Hibs, còmhla ri Hatem Abd Elhamed agus Nir Bitton aig Celtic), cha bhi fear eile air am bì mòran ann am ball-coise na h-Alba eòlach,

Beram Kayal, a bha aig Celtic agus a fhuair tadhal an aghaidh Iosrael an oidhche ud aig Hampden, an sàs.

Bi cuideam air Moanes Dabour aig Hoffenheim agus Erran Zahavi, a chuir an tadhal eile

Bi Alba iad fhèin as aonais grunn chluicheadairean a bhiodh am measg sgioba Steve Clarke mar as àbhaist.

Ged a tha romhainnean ann am pailteas aig Clarke ann an meadhan na pàirce, 's ann aig aghaidh an sgioba a bhios na h-Albannaich gann.

Le Lawrence Shankland aig Dundee United agus Oli McBurnie aig Sheffield United a-mach às a gheam agus e air a ghoirteachadh agus Johnny Russell aig Sporting Kansas City a fuireach anns na Stàitean Aonaichte ri linn an casg-siubhail, bi aig Clarke ri tionndadh gu cluicheadair eile aig aghaidh an sgioba.

As dèidh miosan de dheasbad mu dheidhinn co dhà a chluicheadh e gu eadar-nàiseanta, cho-dhùn Lyndon Dykes Alba a riochdachadh seach Astràilia.

Às dèidh dha ainm a chuir ri cùmhnant aig Queen's Park Rangers, bi e a-nis an dòchas na tadhail a chuir do sgioba nach eil ach air 20 tadhal fhaighinn aig ìre eadar-nàiseanta eadara.

Bì aig James Forrest, a fhuair trì tadhail an aghaidh Iosrael ann an 2018, agus cluicheadairean ann an meadhan na pàirce, ri taic a chuir ris an loidhne aghaidh a-rìthist.

Cluichidh Alba an aghaidh Iosrael agus iad an dòchas iomairt Lìog nan Dùthchannan a thòiseachadh gu làidir, le Poblachd na Seic a feitheamh air Steve Clarke agus a sgioba air Diluain.

Tha droch thoiseach tòiseachaidh air stad a chuir air iomadh iomairt agus oidhipr aig Alba faighinn gu farpais eadar-nàiseanta thar nam bliadhnaichean mu dheireadh.

Bi Steve Clarke ag iarraidh air an sgioba na 3 puingean a thogail mar bu choir, ach cuideachd an aghaidh sgioba a bhios ag amas an aon rud.