"Tomhais de mhisneachd" an Uibhist

Thuirt Àrd-oifigear NHS nan Eilean Siar, Gòrdan Jamieson, gu bheil "tomhais de mhisneachd" ann a thaobh sgapadh Chovid-19 ann an Uibhist.

Chaidh aon chùis ùr a dhearbhadh san sgaoileadh ann an Uibhist a Deas, Èirisgeigh agus Beinn nam Fadhla, a' toirt na h-àireimh gu lèir san sgaoileadh sin gu 46.

Tha cùis eile ann an Uibhist a Tuath nach eil co-cheangailte ris an sgaoileadh aig deas.

Thuirt Mgr Jamieson gum bu chòir dhan a h-uile duine ann an Uibhist leantainn orra leis na ceumannan a th' ann feuch smachd fhaighinn air a' bhìoras.

Thug e taing dhan t-sluagh 'son na rinn iad thuige seo.

"Tha tomhais de mhisneachd againn le aon chùis ùr", thuirt Mgr Jamieson.

"Tha sinn ag iarraidh air daoine cumail orra le còmhdach aodainn a chleachdadh, àiteachan trang a sheachnadh, is làmhan is eile a nighe gu tric.

"Cum astar-sòisealta, is dèan cinnteach gun cum sibh fa leth is gun cuir sibh deuchainn air dòigh sa bhad ma nochdas comharran idir den bhìoras.

"Tha mi a' toirt taing dhan a h-uile duine 'son na rinn iad, is tha sinn an dòchas gu bheil sinn air slighe nas dòchasaiche a-nise", thuirt e.

Aig an dearbh àm, chaidh 11 chùis ùr de Chovid-19 a chlàradh ann an sgìre NHS na Gàidhealtachd Diardaoin.

Thig riaghailtean ùra a thaobh a' Choròna-bhìorais a-steach aig 6:00f Dihaoine.