Tha stèisean peatrail ann an Uibhist a Tuath a' cuingealachadh na dh'fhaodas daoine a cheannach de pheatral gu luach £20.
Aig deireadh an là Diciadain, cha robh ach 600 liotair de pheatral air fhàgail aig bùth Iain Mhoireasdain ann an Loch nam Madadh.
Nam biodh iad air an t-òrdan aca fhaighinn mar as àbhaist, bhiodh suas ri 5,000 liotair aca.
Thuirt Certas Energy, a bhios a' lìbhrigeadh peatrail dha na h-Eileanan Siar, gur e trioblaidean le aiseagan agus an droch aimsir, a bharrachd air connadh a bhith gann, as coireach.
Chan eil trioblaid sam bith ann le dìosal.
Tha dùil gum faigh an stèisean tuilleadh peatrail a-steach Dihaoine.
Tha dùil cuideachd ri soitheach Disathairne a lìonas an stòr ann an Loch a' Chàrnain às ùr.
Thabhainn Certas Energy leisgeul airson na bh' air tachairt.
