Tòisichidh Fèis Cheilteach Innse Gall ann an Steòrnabhagh Diciadain.
Thathas a' comharrachadh 25 bliadhna bho thòisich an fhèis.
Am measg na bhios a' nochdadh air an àrd-ùrlar eadar Diardaoin is Disathairne bidh Texas, Julie Fowlis, Skipinish, Trail West, is gu leòr eile.
Le buaidh a' phandemic chan eil an fèis air a bhith ann bho 2019, ged a chaidh tachartasan air-loidhne air adhart tro staing Chovid.
Tha fadachd mhòr air a h-uile duine an fhèis a bhith air ais tha e coltach, is an HebCelt an dùil gun tèid na ticeadan a tha air fhàgail a cheannach mus tòisich an fhèis.
Tha iad ag ràdh cuideachd gu bheil dùil ri buannachd eaconomaich.
"Tha gnothachasan air a bhith ag innse dhuinn gu bheil iad cho toilichte gu bheil sinn air ais", thuirt Caroline NicIllinnein a tha air a bhith an sàs san fhèis bho thùs.
Buaidh
"'S e neart na sgioba againn agus an taic a th' aig daoine dhan fhèis as coireach gun deach againn air cumail a' dol tron dà bhliadhna mu dheireadh nuair nach robh airgead sam bith a' tighinn a-steach", thuirt i.
Tha Lach MacIlleathain, aig a bheil taigh-bìdh ann am meadhan Steòrnabhaigh, am measg luchd-gnothaich a tha air a dhòigh gu bheil an HebCelt air tilleadh.
"Seo seachdain cho cudromach 's a th' againn sa bhliadhna", thuirt Mgr MacIlleathain.
"Thug e buaidh mhòr oirnn nach robh an fhèis ann anns na bliadhnaichean mu dheireadh oir 's e seachdain nuair a bha fios againn gum biodh airgead a' tighinn a-steach.
Bidh gnothaichean a' tòiseachadh tron là Diciadain is gheibhear am fiosrachadh air fad mun fhèis an seo, taobh a-muigh.
Bidh BBC Radio nan Gàidheal a' craoladh beò bhon fhèis Diardaoin is Dihaoine.
