Ionad dualchais is cafaidh san amharc aig Port Àird nan Saor

PlanaicheanMRH Design

Geàrr-shealladh

  • Tha planaichean mòra ann Port Àird nan Saor ath-bheòthachadh

  • Thathas a' coimhead an-dràsta ri inntrigeadh aig an làraich

  • Tha plana ann cafaidh is ionad dualchais a thogail

  • Rachadh stòiridh a' ghàrraidh innse ann

Tha dùil gun tèid ionad dualchais is cafaidh a thogail aig Port Àird nan Saor mar phàirt den phròiseict gus ath-bheòthachadh a thoirt air a' ghàrradh.

Bha na mìlltean ag obair aig an làraich anns na 70an a' togail chlàran-ola, ach tha e air a bhith a' laighe falamh fad còrr is 20 bliadhna.

A-nise tha planaichean mòra ann gus an gàrradh a stèidheachadh às ùr mar ionad far an rachadh crainn-gaoithe aig muir a thogail, a bharrachd air a bhith a' dìth-choimiseanadh seann uidheamachd ola 's gas.

Thòisich dreideadh mar-thà is thathas an dòchas air a' cheann thall gun tèid na ceudan de dh'obraichean a chruthachadh aig an làraich.

Àird nan SaorHaventus

'S ann a tha planaichean a thèid a dheasbad aig Comhairle na Gàidhealtachd Diciadaoin seo tighinn a' coimhead ri inntrigeadh aig an làraich, le cearcall-rathaid ùr agus àite do bhusaichean.

A thuilleadh air sin, rachadh cafaidh a thogail agus ionad dualchais, far am biodh stòiridh a' ghàrraidh thar nam bliadhnaichean air innse tro dhealbhan is taisbeanaidhean.

Thathas a' moladh do chomhairlichean cead a thoirt seachad.