मरिया आँधी: पोर्टो रिकोमा बिजुली अवरुद्ध

मरिया आँधीले ३५ लाख जनसंख्या भएको पोर्टो रिको सम्पूर्ण टापुमा बिजुली अवरुद्ध पारिदिएको आपतकालीन सेवाका अधिकारीहरुले बताएका छन्।

प्रकोप व्यवस्थापन समितिका प्रमुख एबनर गोमेजले भने- पोर्टो रिकोमा कसैका घरमा बिजुली छैन।

अमेरिकी 'नेशनल हुरिकन सेन्टर'का अनुसार विनाशकारी बाढीले टापुका कैयौं भाग बगाएको छ।

मरिया पोर्टो रिकोबाट बाहिरिँदैछ र यसको शक्ति क्याटेगरी २ को बनेको छ।

कर्फ्यु

यो अमेरिकी भूभागका गभर्नर रिकार्डो रोसेलेले साँझ ६ बजेदेखि कर्फ्यु लगाएका थिए।

आँधी अघि पोर्टो रिकोमा ५०० आपतकालीन शिविरहरु खडा गरिएका थिए र धेरैजसोले त्यहाँ शरण लिएका थिए।

मरिया क्यारिबियन क्षेत्रमा यहि महिना आएको दोश्रो ठूलो समुन्द्री आँधी हो।

पहिलो एर्मा आँधी क्याटेगरी ५ को थियो।

मरिया आँधी झण्डै झण्डै एर्माको बाटोमा हिँडेको थियो।