Bidh sgeama ùr a' dol an àite RET son companaidhean bathair

Dh'fhoillsich an riaghaltas an t-seachdain seo nach bi sgeama RET ann son companaidhean bathair tuilleadh.

Thèid iad gu siostam eile a bhios stèidhichte air an sgeama lughdachaidh a bh'ann do chompanaidhean bathair ro RET.

Iomagain

Tha sin air iomagain a chur air cuid de chompanaidhean is iad ag ràdh gun tèid na cosgaisean aca an àird.

Bha an siostam a bh'ann ro RET a' toirt lughdachadh faraidhean do chompanaidhean a bha tric a' cleachadh slighe.

Bha companaidhean beaga gu h-àraidh a' gearain nach robh làraidhean gu leòr aca son cothrom fhaighinn air na faraidhean nas saoire.

Sùbailte

A-nise tha an riaghaltas ag ràdh gum bidh an sgeama ùr "nas sùbailte" na am fear a bh'ann roimhe.

Thuirt iad gu bheil iad airson cluinntinn bho na companaidhean fhèin is gu bheil cothrom ann atharrachaidhean a dhèanamh air an sgeama ùr a rèir na beachdan a gheibh iad.

Thuirt an riaghaltas cuideachd gum faigh companaidhean bathair suas ri 25% bho na faraidhean aca, suas bho 15% san t-seann siostam ro RET.

Dhearbh an riaghaltas cuideachd gum bi an sgeama RET air Caolas Bharraigh is Caolas na Hearadh, nuair a thig e, ag obair san aon dòigh sa tha e air na slighean eile air a bheil RET.