ATMIS oo sheegtay in ay dhexdhexaad ka tahay muranka doorashada ee ka taagan Kismaayo

Tebin toos ah

1. 24 Nofembar 2024Wariyihii ugu waqtiga dheeraa BBCSomali ayaa Hargeysa ku geeriyooday

   

   Xigashada Sawirka, Farhan Jimale

   Alle ha u naxariisto waxaa caawa magaalada Hargeysa ku geeriyooday Cabdirizaaq Xaaji Maxamed Siraad oo ahaa wariyihii ugu waqtiga dheer ee ka soo shaqeeya BBC laanta Afka Soomaaliga.

   Cabdirizaaq wuxuu ahaa nin fururan oo kaftan badan weligiina cid kama caban. Wuxuu ahaa waayo arag muddo dheer soo shaqeeyay.

   1947 ayuu waxbarashada ilaa dugsiga sare ku dhamaystay magaalada Hargeysa. Bishii September 1969 ayuu waxbarasho jaamacadeed ku u yimid magaalada london, isagoo ku qalinjebiyay cilmiga Chemistry.

   Cabdirisaaq waxa uu shaqo ka bilaabay laanta Soomaaliga kaddibna waxa uu noqday shaqaalaha rasmiga.

   Cabdirsaaq aabihiis waxa uu ahaa nin diinta magac ku leh oo si weyn looga yaqaan magaalada Sheekh.

2. 24 Nofembar 2024Wadaad Yahuudi ah oo Imaaraadka lagu waayay oo la shaaciyay dilkiisa

   

   Xigashada Sawirka, Chabad

   Israa’iil ayaa sheegtay in hoggaamiye diimeed Yahuudi ahaa oo lagu waayay dalka Imaaraadka Carabta la dilay, waxayna wacad ku martay in ay baadi goobayaan ciddii dilkiisa ka dambeysay.

   Zvi Kogan, oo xubin ka ahaa ururka Yuhuudda Ortodokska ee Chabad, ayaa la la'aa tan iyo Khamiista, sida uu sheegay xafiiska ra'iisul wasaaraha Israa'iil, arrintaan dhalisay baaritaan ay wadaan hay'adda sirdoonka Israel ee Mossad iyo mas'uuliyiinta Imaaraadka Carabta.

   “Dilka Zvi Kogan waa dhacdo argagaxiso oo ka dhan ah Yahuudda, shacabka Israa’iil waxa ay qaadi doonaan tallaabo kasta oo ay sharciga ku horgeyn doonaan dambiilayaasha dilkiisa ka dambeeyay,” ayaa lagu yiri warka ka soo baxay xafiiska Ra’iisul Wasaaraha.

   Saraakiisha Israel ayaa xiriir la sameeyay qoyska Mr Kogan, oo ah muwaadin Israel-Moldovan ah, tan iyo markii la waayay, ayaa warka soo baxay la si raaciyay.

   Wakaalladda Wararka Imaaraadka Carabta ayaa sheegtay in Wasaaradda Arrimaha Gudaha ay baadi-goob ugu jirtay ninka la la’yahay.

   Abu Dhabi ayaa horay xiriir rasmi ah ula samaysatay Israa’iil kaas oo salka ku hayay heshiiskii uu Maraykanku gar-wadeen ka ahaa, ee loo yaqaan heshiiskii Abraham.

3. 24 Nofembar 2024Axmed Madoobe oo sheegay in uu wadahadal la bilaabi doono dowladda federaalka

   

   Xigashada Sawirka, Jubbaland State House

   Madaxweynaha Jubbaland Axmed Madoobe ayaa isaga oo jeedinayay khubadiisa musharraxnimo ee doorashada lagu muransan yahay ee la filayo in ay berri ka dhacdo Kismaayo waxa uu sheegay in uu qorsheynayo in uu dib usoo celiyo wadashaqayntii ay Jubbaland la lehayd dowladda federaalka Soomaaliya.

   "Waxaa jir aoqodobo aan isku haynay, laakiin waxaan diyaar u nahay hadii aad i doorataan mudane gudoomiye iyo xildhibaano, inaan isku dayayo bal inaan dowladda federaalka ka wadashaqayno oo dib ugu soo noqono miis wadahadal ," ayuu yiri Axmed Madoobe.

   Maamulka Jubbaland ayaa 10 kii bishan Novermber waxa ay sheegeen in ay xiriirka u jareen dowladda federaalka Soomaaliya.

4. 24 Nofembar 2024Putin uu sheegay in mar kale isticmaali doono gantaalo cusub

   

   Xigashada Sawirka, Shutterstock

   Ruushka waxa uu haystaa kayd gantaallo cusub oo awood leh “diyaarna u ah in la isticmaalo”, ayuu yiri madaxweyne Vladimir Putin, maalin uun ka dib markii dalkiisu gantaal cusub oo nuuca riddada dheer ah ku riday magaalada Dnipro ee dalka Ukraine.

   Khudbad aan horay loo sii qorsheyn oo laga sii daayay telefishinka, ayuu hoggaamiyaha Ruushka ku sheegay in gantaalka Oreshnik uu ahaa mid aan la joojin karin, wuxuuna ballan qaaday in uu sameyn doono tijaanooyin kale oo dheeraad ah, oo ay ku jiraan "jawiyada dagaalka".

   Isticmaalka Ruushka ee gantaalka Oreshnik ayaa soo afjaray toddobaad colaadeed oo sii kordhaysay taasoo sidoo kale keentay in Ukraine ay markii ugu horreysay gantaallada Mareykanka iyo Ingiriiska ku riddo Ruushka.

   Madaxweynaha Ukraine Volodymyr Zelensky ayaa ugu baaqay hogaamiyayaasha caalamka inay bixiyaan "jawaab dhab ah" si Putin "uu u dareemo cawaaqibka dhabta ah ee ficilladiisa".

5. 24 Nofembar 2024ATMIS oo sheegtay in ay dhexdhexaad ka tahay muranka doorashada ee ka taagan Kismaayo

   

   Xigashada Sawirka, ATMIS

   War qoraal ah oo ay soo saareen ciidamada ATMIS ee Soomaaliya ka hawlgala ayaa waxa ay sheegeen in ay ka war heleen eedo loo jeediyay, kuwaas oo ku aadan ku lug lahaashahooda muran xooggan oo salka kui haya doorashooyinka Jubbaland oo ka taagan magaalada Kismaayo.

   ATMIS ayaa warkeeda ku tiri: "ATMIS waxay hoosta ka xariiqeysaa dhexdhexaadnimadeeda iyo eex la'aanteeda ku aadan nidaamyada doorashooyinka Soomaaliya oo uu ka mid yahay kan lagu muran san yahay ee ka socda Jubbaland,".

   Magaalada Kismaayo ayaa waxaa ka taagan muran ku aadan doorashada madaxweynaha Jubbaland, iyada oo mucaaradku ay ka soo horjeedaan nidaamka doorashada ee ay qabanayaan guddi uu magacaabay maamulka Jubbaland ee haatan talada haya. Sidoo kale dowladda Soomaaliya ayaa ka soo horjeeda sida wax u socdaan.

   Shalay ayaa qayb ka mid ah mucaaradku waxay ku dhawaaqeen "in ay madaxweyne doorteen".

   Dhanka kale waxaa iska hor imaad uu dhexmaray ilaalada mid ka mid ah musharrixiinta Kismaayo iyo ciidamada booliska ee Jubbaland, waxaana ku dhintay hal ruux oo ilaalo u ahaa musharraxa.