QM oo ka digeysa gaajo iyo macluul ka dhacda Bariga Afrika

Tebin toos ah

1. 27 Agoosto 2020Iran oo hay`adda IAEA u oggolaatay goobihii looga shakisanaa nukliyeerka

   

   Xigashada Sawirka, EPA

   Iran ayaa oggolaatay in baarayaasha Hay`adda Quwadda Atoomikada Adduunka ay tagaan labo goob oo hore looga shakisanaa nukliyeerka.

   Warbixin ay si wada jir ah u soo saareen ayaa lagu sheegay in Iiraan ay arrintan u sameyneyso si loo xalliyo khilaafkii ka taagnaa goobahaas.

   Heshiiskan ayaa yimid kaddib markii uu Isniintii Tehran booqasho ku tegay agaasimaha guud ee IAEA Rafael Grossi.

   Hay`addan ayaa Iiran ku cambaareysay inaysan jawaab ka bixin su`aalaha ay ka qabtay in howlo nukliyeer ay ka socdaan goobahaas, isla markaana ay u diidday inay booqdaan.

   Waxaa loo maleynayaa in howlahaasi ay socdeen sanadkii 2015, markaas oo ay Iran heshiis la gashay quwadaha adduunka, heshiiskaas oo xaddidayay barnaamijkeeda nukliyeerka.

   Iran ayaa ku adkeysaneysa inaysan weligeed baadi goobin hubka nukliyeerka, balse baaritaan ay hore u sameysay IAEA ayaa lagu ogaaday in tan iyo sanadkii 2003-dii ay fulisay howlo nukliyeer sameyn ah.

2. 27 Agoosto 2020Gool dishay ninkii ugaarsiga ka soo badbaadiyay

   

   Xigashada Sawirka, MATHEWSON FAMILY

   Nin caan ah oo u ololeeya duurjoogta una dhashay dalka Koofur Afrika ayaa geeriyooday kaddib markii ay soo weerareen labo Gool oo cad, kuwaas oo uu u kaxeeyay socod.

   Xaaska West Mathewson, ayaa daawaneysay markii uu weerarku dhacayay balse waxba kama aysan qaban karin.

   West ayaa ahaa milkiilaha, Lion Tree Top Lodge, oo caan ka ah gobolka Limpopo.

   Labada Gool ayaa kaddib waxaa loo wareejiyay meel kale, waxaana la filayaa in lagu sii daayo duurka.

   Labada Gool ayaa waxaa dhex maray dagaal, kaddibna mid ka mid ah ayaa ku soo jeesatay ninkan oo loogu yeeri jiray "Adeer West".

   Mr Mathewson ayaa la sheegay in libaaxyadan uu ka soo badbaadiyay ugaarsi, waxaana lagu xanaaneyn jiray meel ka mid ah hoteelkiisa.

   Labadan Gool ayaa sanadkii 2017 dilay nin ka shaqeynayay meel u dhow hoteelka, kaddib markii ay xarigga goosteen.

3. 27 Agoosto 2020Duqeymo uu Mareykanku ka geystay Soomaaliya oo lagu dilay xubno ka tirsan Alshabaab

   

   Duqeymo dhanka cirka ah oo uu Mareykanku Isniintii ka geystay Soomaaliya, ayaa wxaaa lagu dilay lix ka tirsan AlShabaab, sida laga soo xigtay Taliska Ciidamada Mareykanka ee Afrika (AFRICOM).

   AFRICOM ayaa sheegtay in duqeymahan ayaa looga jawaabayay weerar ay Alshabaab ku qaadday ciidamada Mareykanka iyo ciidamada kale ee caawinayay.

   Dagaal-yahannada AlShabaab ayaa la sheegay inay weerarka ka soo qaadeen dhisme ku yaalla meel u dhow Dar as-Salam kahor inta aysan dhicin duqeynta cirka.

   Saddex kale oo AlShabaab ayaa lagu dhaawacay weerarka sida ay AFRICOM sheegtay.

   AFRICOM waxay sheegtay in duqeymahaasi aysan waxyeello ka soo gaarin shacabka.

4. 27 Agoosto 2020Garowe: Shirkii u socday Deni iyo Axmed Madoobe oo la soo gabagabeeyay

   

   Xigashada Sawirka, PUNTLAND STATE HOUSE

   Dowlad-goboleedyada Jubaland iyo Puntland ayaa shir labo maalmood socday wuxuu maanta ugu soo gabagaboobay magaalada Garowe, ee caasimadda Puntland.

   Madaxweynayaasha labada maamul-goboleed, Axmed Maxamed Islaan iyo Siciid Cabdullaahi Deni ayaa shirkooda waxay uga wada hadleen xaaladda siyaasadeed iyo tan amni ee dalka ka taagan.

   Labada madaxweyne waxay sidoo kale qadka telefoonka kula hadleen madaxda Dowladda Federaalka iyo madaxda maamul-goboleedyada kale, iyagoo ka wada hadlay sidii xal mideysan looga gaari lahaa arrimaha ku gedaaman doorashada.

5. 27 Agoosto 2020Covid-19: Xiisadda u dhaxaysa Tanzania iyo Kenya oo sii xoogeysatay

   

   Xigashada Sawirka, Getty Images

   Tanzania ayaa mamnuucday saddex kale oo diyaarado ah oo Kenya laga leeyahay, iyadoo uu sii xoogeysanayo muranka u dhaxeeya labadan dal ee deriska ah ee la xiriira Covid-19.

   Waaxda ku shaqada leh diyaaradaha ee Tanzania, TCAA ayaa mamnuucday diyaaradaha Fly 540, Air Kenya Express iyo Safarilink Aviation.

   Diyaaradaha ayaa maalin walba u duula goobaha dalxiiska ee Kilimanjaro iyo Zanzibar.

   "Sababta loo mamnuucay saddexda diyaaradood ee Kenya laga leeyahay waa muranka u dhaxeeya labada dal," ayuu yiri Hamza Johari oo ah agaasimaha guud ee waaxdaasi.

   Mar sii horreysay, diyaaradda Kenya Airways ayaa laga mamnuucay Tanzania kaddib markii dowladda Kenya ay ku amartay rakaabka ka imaanaya Tanzania inay muddo 14 maalmood ah is karantiilaan.

   Madaxweyne John Magufuli ayaa bishii June ku dhawaaqay in Tanzania uusan ka jirin coronavirus.

   Dowladdiisa waxaa lagu cambaareeyay sida ay isaga dhega tirtay xanuunka.

6. 27 Agoosto 2020QM oo ka digeysa gaajo iyo macluul ka dhacda Bariga Afrika

   

   Xigashada Sawirka, CIAT

   Hay`adda Cuntada Adduunka (WFP) ayaa sheegtay in gaajo iyo macluul daran ay saameyn ba`an ku yeelatay malaayiin qaxooti ah oo ku nool bariga Afrika, kuwaas oo ku tiirsan gargaar cunto.

   Waxay sheegtay in saameynta dhaqaale ee xanuunka safmarka ah ee Covid-19 ay tahay inuu yareeyay deeqdii laga heli jiray deeqbixiyeyaasha.

   WFP ayaa hore 30% u yareysay cuntada amaba lacagihii ay siin jirtay in ka badan 2.7 milyan oo qaxooti ku nool dalalka Itoobiya, Uganda, Kenya, Suudaanta Koofureed iyo Jabuuti.

   "Qaxootiga ayaa gaar ahaan u nugul faafitaanka Covid-19 sababtoo ah xeryo ciriiri ah ayay ku nool yihiin iyagoo aan heysan hoy fiican, isla markaana aan heli karin adeegyo caafimaad, biyo nadiif ah iyo fayadhowr," ayuu yiri Agaasimaha WFP ee Bariga Afrika Michael Dunford.

7. 27 Agoosto 2020Faransiiska oo laga codsaday inuu soo farageliyo hoggaamiyaha Ivory Coast oo doonaya inuu mar kale xilka u tartamo

   

   Xigashada Sawirka, EPA

   Madaxweynaha Faransiiska Emmanuel Macron ayaa laga codsaday inuu soo fara geliyo Madaxweynaha Ivory Ivory Coast Alassane Ouattara oo doonaya inuu mar saddexaad u tartamo xilka madaxtinnimada, taas oo ay mucaaradku sheegeen inay tahay mid aan dastuurka waafaqsaneyn.

   Hoggaamihiyii hore ee fallaagada Ivory Coast Guillaume Soro ayaa warqad uu qoray ugu sheegay Madaxweyne Macron in dadka dalkaas ay ogaadeen sida uu Faransiisku arrintaasi uga aamusan yahay.

   Wuxuu sheegay in Faransiisku uu u riyaaqay hadalkii hore ee uu Ouattara ku sheegay inuusan mar kale tartami doonin, balse uu ka aamusay markii uu madaxweynuhu oggolaaday magacaabidda ay xisbigiisu usoo magacaabeen inuu tartamo.

   Mr Soro iyo madaxweynihii hore ee dalkaas Laurent Gbagbo ayaa laga mamnuucay inay xilka madaxtinnimada u tartamaan, sababo la xiriira in hore eedeymo loogu soo oogay.

   Mr Soro waxaa bishii April ee sanadkan lagu eedeeyay musuqmaasuq.

   Mr Gbagbo waxaa bishii November ee 2019-kii lagu eedeeyay inuu “xatooyo” u geystay Bankiga Dhexe ee Dalalka Galbeedka Afrika.

8. 27 Agoosto 2020Masar: Eedeysanayaal looga shakisnaa kufsi ka dhacay gudaha hotel oo baxsaday

   

   Xigashada Sawirka, Getty Images

   Eedeysanayaasha oo la sheegay inay kufsi ka geysteen hoteel weyn oo ku yaalla caasimadda Masar ee Qaahira, ayaa la sheegay inay dalkaasi isaga carareen.

   Toddobo ka mid ah eedeysanayaasha ayaa baxsaday bishii July markii ay soo baxeen wararka sheegaya kufsiga ay geysteen.

   Waxay ahayd bil kahor markii dacwad laga gudbiyay.

   Labada kale ayay booliisku ku raad joogaan.

   Dacwad-ooge dalkaas ku sugan ayaa sheegay in Masar ay qaadeyso tallaabo caalami ah oo lagu soo qabanayo toddobada eedeysane.

   Falka kufsiga ayaa la sheegay inuu ka dhacay hoteelka Fairmont Nile City oo ku yaalla Qaahira sanadkii 2014, halkaas oo sagaalka nin la sheegay inay kufsi ugu gesyteen haweeney da` yar ah.

   Dhacdadan ayaa lagu waadagay barta Instagram.

   Dacwad-oogaha ayaa ku borriyay dhibbanayaasha kufsiga inay marka hore dacwad rasmi ah gudbiyaan kahor inta aysan ku shaacin baraha bulshada.